Најдобриот тенисер во историјата, Новак Ѓоковиќ, е подготвен за својот долгоочекуван камбек на терените, по паузата која траеше уште од турнирот во Индијан Велс. Српскиот ас, кој се опоравуваше од повреда на десното рамо, го избра Мастерсот во Рим како главна подготовка за претстојниот Ролан Гарос. Иако Ѓоковиќ е шесткратен шампион во „вечниот град“, патот до 13-то финале на овој турнир изгледа потежок од кога било.
Патот до финалето: Потенцијални мини на секој чекор
Како четврти носител на турнирот, Новак е слободен во првото коло, но веќе од стартот на 8 мај го очекуваат сериозни испити:
- Старт (Р64): Својата кампања ќе ја започне против подобриот од дуелот меѓу Мартон Фучович и еден од квалификантите.
- Шеснаесетфинале (Р32): Потенцијални противници се незгодните Уго Хумберт, Фабијан Марожан или Вит Коприва.
- Осминафинале: Овде веќе работите стануваат сериозни со можен дуел против Карен Хачанов или Артур Риндеркнеч.
- Четвртфинале: Во оваа фаза Новак би можел да се соочи со специјалисти за земја како Каспер Руд, Лоренцо Музети или Франциско Серундоло.
- Полуфинале и Финале: Доколку стигне до самата завршница, го очекуваат најголемите закани во ликот на Александар Зверев во полуфиналето, односно Јаник Синер или Данил Медведев во големата битка за трофејот.
„Љубовта кон играта ме држи буден“
Иако гласините за пензија често се појавуваат за време на неговите отсуства, 38-годишниот ветеран во неодамнешно интервју за „Esquire Australia“ беше дециден дека сè уште не му е дојдено времето за повлекување.
„Она што ме држи е пред сè мојата љубов кон играта. Тенисот е мојот живот веќе долго време и сè уште уживам во секој момент на теренот. Не чувствувам дека сум го ‘комплетирал’ тенисот. Сè уште се чувствувам силно и способен да се натпреварувам со помладите играчи“, изјави Ѓоковиќ.
Новак во Рим влегува со импресивен сооднос од 7 победи и 2 порази оваа сезона, вклучувајќи го и финалето на Австралија Опен, каде во полуфиналето го совлада токму Јаник Синер.
