Трката за титулата во Премиер лигата доби нова, драматична епизода на „Лондон стадионот“. Арсенал со многу мака и голема доза на среќа успеа да го совлада Вест Хем со 0-1, со што се доближи на само неколку чекори до првиот шампионски пехар по пауза од 22 години. Додека „топчиите“ слават пет бода предност пред Манчестер Сити, Вест Хем по овој пораз тоне сè подлабоко во зоната за испаѓање.
Човек на одлука беше Леандро Тросар, кој во 83-та минута ја прекина агонијата на гостите. Откако во првиот дел во само неколку секунди двапати ја погоди рамката од голот, Белгиецот конечно го пронајде патот до мрежата, иако со помош на Томас Соучек од кого топката се одби и го измами домашниот голман. Овој погодок дојде во моменти кога Арсенал изгледаше ранливо, особено по принудната измена на Бен Вајт која го натера Микел Артета на кратко да го повлече Деклан Рајс на позицијата десен бек.
Давид Раја и ВАР технологијата – клучни за трите бода
Арсенал денеска му должи голема благодарност на својот чувар на мрежата, Давид Раја. Шпанскиот голман прво со чудесна интервенција го сопре ударот со глава на Кастелјанос, а во клучните моменти од вториот дел, непосредно пред голот на Тросар, со рефлексна одбрана го разочара Матеус Фернандес кој беше во зицер позиција.
Сепак, вистинската драма се случи во судиското продолжение. Калум Вилсон ја затресе мрежата на Арсенал за израмнување, предизвикувајќи делириум кај домашните навивачи, но радоста кратко траеше. По долга и детална ВАР проверка, судијата го поништи погодокот поради фаул врз голманот Раја.
Оваа одлука донесе бес на трибините, но и огромно олеснување за Артета и неговите избраници. Арсенал, кој веќе го чека и финалето во Лигата на шампионите, сега е во пол-позиција да ја круниса оваа неверојатна сезона со најпосакуваниот домашен трофеј.
