По девет години исполнети со трофеи, 457 настапи и незаборавни моменти, капитенот на Манчестер Сити, Бернардо Силва, потврди дека ова е неговата последна недела на „Етихад“. Во емотивно и искрено интервју за „The Athletic“, 31-годишниот Португалец се осврна на својата кариера во Англија, откривајќи детали за соблекувалната, ривалствата и причините поради кои овојпат нема враќање назад.
„Мојот план отсекогаш беше да го исполнам договорот до крај. Пеп беше главната причина што останав претходните години, но сега е време за нов предизвик и посветли предели за моето семејство“, вели Силва, кој во октомври очекува второ дете.
„Тепачката“ во тунелот на Олд Трафорд
Бернардо се потсети на своето прво манчестерско дерби во 2017 година, кое остана запаметено по инцидентот во тунелот по победата на Сити од 2-1.
„Се сеќавам на тоа“, вели тој со насмевка. „Бев во тунелот и разговарав со Линделоф, мојот поранешен соиграч од Бенфика. Нашите играчи славеа во соблекувалната веднаш до нивната. Мурињо не беше среќен, почна викање, туркање и одеднаш работите ескалираа на глупав начин. Знам кој го фрли пластичното шише кон Мурињо, но нема да кажам по девет години. Тоа беше голема грешка“.
Трката за 100 бода против „Непобедливите“ на Арсенал
Силва смета дека генерацијата на Сити која освои 100 бода (популарните „Centurions“) заслужува поголемо признание во историјата на англискиот фудбал.
„Тешко е да се споредуваат ери, но кога ќе ја земете предвид сегашната конкуренција, ова е една од најдобрите генерации во историјата. Луѓето не ги сакаат победниците, па затоа многумина се обидуваат да ни го одземат кредитот преку обвинувањата за финансиските прекршоци. Но, тоа што го правиме на теренот е непобитно“.
Ривалството со Ливерпул и „студениот туш“ за шампионот
Една од најпознатите фотографии на Бернардо е онаа од 2020 година, кога Сити им приреди шпалир на новите шампиони од Ливерпул. Додека сите ракоплескаа, Силва стоеше со кафе во раката, одбивајќи да аплаудира.
„Јас сум навистина лош губитник. Многу сум компетитивен. Но, имам огромен респект за тоа ривалство. Тие нè направија подобри, ние нив исто така. Кога живеете такво ривалство, не можете да се сакате. Тие мора да нè мразат нас, ние мора да ги мразиме нив. Тоа е нормално“.
Зошто Арсенал мораа да „станат мажи“?
Зборувајќи за овогодишната трка за титулата, Силва беше брутално искрен за напредокот на „топчиите“ под водство на Микел Артета.
„Тие се заедно пет години и беше сосема природно конечно малку да ‘станат мажи’ (man up) и да почнат да предизвикуваат за титули. Сепак, за мене наш најголем ривал низ годините беше Ливерпул, убедливо. Фрустрирачки е што оваа сезона сè е во рацете на Арсенал. Верувам дека ако не правевме толку грешки во овој транзициски период, веќе ќе ја имавме освоено лигата“.
Генијалноста на Гвардиола и болката за Диого Жота
Бернардо не штедеше пофалби за својот менаџер, нарекувајќи го визионер кој никогаш не престанува да размислува за играта. „Тој е убедливо најдобриот офанзивен концептуалист што некогаш сум го видел. Ќе биде екстремно тешко да се замени кога еден ден ќе замине“.
Интервјуто доби и тажна нота кога Силва се осврна на трагичната смрт на неговиот соиграч од репрезентацијата, Диого Жота, кој загина во сообраќајна несреќа минатиот јули.
„Се сеќавам на него секој ден, особено кога сум со националниот тим. Тешко е да се руча или да се игра карти без него. На ова Светско првенство сакаме да победиме за португалскиот народ, но и за да го зачуваме споменот на Диого“.
Што е следно?
Бернардо својот последен натпревар во Премиер лигата ќе го одигра против Астон Вила, а претходно го чека финалето на ФА Купот против Челси. „Сакам да завршам со уште неколку титули. Што се однесува до мојот следен клуб, му кажав на агентот дека ќе разговараме на 25-ти мај. Сакам да уживам во последните денови тука“.
