Дали Македонија го допре дното кога станува збор за спортските права? За првпат од осамостојувањето, македонските граѓани ќе бидат лишени од можноста бесплатно да го следат најголемиот спортски настан на планетата, Светското првенство во фудбал, кое оваа година се одржува во САД, Мексико и Канада.
Она што со децении беше традиција и празник во секој дом, сега се претвора во луксуз достапен само за оние кои имаат платени канали. Како дојде до ова и кој дозволи националниот сервис (МРТ) да остане со празни раце?
Светски тренд или домашен пораз?
Свесни сме дека комерцијализацијата на спортот е глобален проблем. Pay-per-view системите и ексклузивните телевизиски права станаа немилосрдна машинерија која го одзема спортот од обичниот навивач. Но, дури и во такви услови, државите наоѓаат начин да го заштитат јавниот интерес.
Ако погледнеме во регионот и пошироко, ситуацијата е сосема поинаква. Државните сервиси во речиси сите земји од опкружувањето и Европа обезбедија права за пренос.
- Србија: РТС (Радио-телевизија Србија)
- Хрватска: ХРТ (Хрватска радиотелевизија)
- Словенија: РТВ СЛО
- Босна и Херцеговина: (Иако правата ги има Арена Спорт, традиционално се бараат решенија за јавен пренос)
- Албанија: ТВ Клан (национална концесија)
- Бугарија: БНТ
- Грција: ЕРТ
Дури и светските велесили како Германија (АРД, ЗДФ), Франција (М6) и Велика Британија (ББЦ, ИТВ) се погрижија Светското првенство да остане достапно за сите. Зошто Македонија е исклучок? Правата за нашата земја ексклузивно ги откупи регионалната мрежа Арена Спорт. Иако се најавува дека преносите ќе бидат со македонски коментар (нешто што се очекуваше одамна), фактот останува, преносот нема да биде бесплатен преку националната телевизија.
Апел до операторите: Вратете му го фудбалот на народот!
Фудбалот отсекогаш бил спорт на масите. Тој е најважната споредна работа за сите, но најмногу за најранливите категории во општеството кои не можат да си дозволат скапи претплати. Светското првенство, според нас, треба да биде бесплатно за секој човек на планетата Земја.
Затоа, упатуваме јавен апел до сите кабелски и телевизиски оператори во државата кои ги нудат каналите на Арена Спорт: Дозволете бесплатно или за минимална, симболична цена да бидат достапни сите Арена канали за секој граѓанин за време на Мундијалот!
Додека гледаме како модерниот фудбал ја уништува самата суштина на играта, ние сè уште сме романтичари. Веруваме дека тој еден месец колку што трае Мундијалот, носи радост и обединување во секој дом. Иако нашата репрезентација за жал пропушти две историски шанси во баражите, секој човек во Македонија заслужува барем на еден месец да се почувствува како рамноправен жител на светот.
Не дозволувајте фудбалот да стане привилегија само за оние со подлабок џеб.
