Тренерот на Ливерпул, Арне Слот, не го криеше разочарувањето по поразот на „Вила Парк“, признавајќи дека неговиот тим ја изгубил контролата врз натпреварот во клучните моменти. Иако „црвените“ успеаја да израмнат на почетокот на вториот дел, Слот смета дека начинот на кој го примиле вториот гол бил пресуден за конечниот исход.
Според холандскиот стратег, Ливерпул имал добар период во играта токму пред Астон Вила повторно да поведе, што го прави овој пораз уште пофрустрирачки за него и неговите избраници.
Моментот кој го промени натпреварот
Слот потенцираше дека израмнувањето на 1-1 и стативата која ја погоди неговиот тим биле знаци за враќање, но една грешка ги вратила домаќините во живот.
„Вториот гол на Вила дојде во момент кога се враќавме во натпреварот. Беше 1-1, претходно ја погодивме стативата и мислев дека сме во добар ритам. Слично беше и во првото полувреме – примивме гол во период кога игравме прифатливо. Но, кога ќе примите гол за 2-1 на таков начин, со нивните навивачи зад нив, тие добиваат дополнителна енергија и почнаа да создаваат сè повеќе шанси. На крајот, тоа доведе до нивна заслужена победа“, изјави Слот по натпреварот.
Проблеми со темпото и интензитетот на домаќинот
Холанѓанецот отворено призна дека неговите играчи едноставно не можеле да се носат со темпото, интензитетот и квалитетот на противникот, особено по вториот примен гол кога Ливерпул целосно престанал да биде тимот кој го диктира темпото на теренот.
Слот дополнително истакна дека Астон Вила била многу блиску до погодок во уште неколку наврати веднаш по почетокот на второто полувреме, што всушност било само најава за она што следувало до крајот на мечот.
Лошата реализација и очајната одбрана при прекини
Слот потенцираше дека реализацијата и дефанзивните грешки при прекините се болка на Ливерпул во текот на целата сезона, а тоа се потврди и на ова гостување каде примија дури четири гола.
„Оваа сезона примивме премногу голови на многу натпревари, а во исто време не постигнавме доволно. Сепак, два гола на гости кај Вила не е лош учинок. Да ми кажеше некој пред мечот дека ќе дадеме два, ќе мислев дека сме многу блиску до позитивен резултат. Проблемот е што примивме четири, а три од нив беа по прекини. Тоа е едноставно премногу“, изјави Слот во својата дополнителна анализа.
Овој пораз ги остава „црвените“ во неизвесност за пласманот во Лигата на шампионите, а Слот ќе мора брзо да ги пронајде одговорите пред последното коло од Премиер лигата.
