Изминатата ноќ во НБА плејофот донесе вистински спектакл и историски моменти во двете конференции. На Западот, младата и застрашувачка екипа на Сан Антонио Спарс стави точка на серијата против Минесота, додека на Истокот, прворангираниот Детроит Пистонс покажа карактер на шампион и избори одлучувачки седми натпревар против Кливленд Кавалирс.
„Мамузите“ со рекорд на франшизата ја збришаа Минесота
Сан Антонио Спарс без милост ги прегази Минесота Тимбервулвс со дури 139-109 во шесттиот натпревар, со што со конечни 4-2 во серијата се пласираше во големото финале на Западната конференција. Колку беше доминантен Сан Антонио во оваа серија најдобро покажува фактот што ги надмудри „волците“ со вкупно 97 поени разлика во шестте меча, без ниту еднаш да се најде во двоцифрена негатива.
Иако Минесота се обиде максимално да го затвори Виктор Вембањама (кој заврши со скромни за него 19 поени), одбраната на Тимбервулвс едноставно беше уништена од надворешната линија на Тексашаните. Сан Антонио постави нов плејоф-рекорд на франшизата со дури 18 погодени тројки од 38 обиди.
Блескаше младиот Стефон Кастл, кој со брутален дабл-дабл од 32 поени и 11 скокови ја предводеше екипата, погодувајќи ги своите први пет обиди за три поени. Голема поддршка имаше во Де’Арон Фокс кој додаде 21 поен и 9 асистенции. Кај Минесота, Ентони Едвардс постигна 24 поени со очаен шут (9/26), па на крајот спортски му честиташе на противникот признавајќи дека Спарс едноставно биле подобар тим.
Во конференциското финале Сан Антонио го чека актуелниот шампион Оклахома Сити Тандер, кој досега со максимални „метли“ ги збриша своите противници.
Пистонс со историско гостување изборија „мајсторка“ во Детроит!
Детроит Пистонс покажа зошто влезе како прв носител на Истокот. Кога беа најмногу отпишани и се соочуваа со елиминација при негатива од 3-2, „клиповите“ го демолираа Кливленд Кавалирс на негов терен со 115-94, израмнувајќи на 3-3.
Победата од 21 поен разлика на гостински терен за тим што се соочува со елиминација е израмнување на 66 години стар НБА рекорд во плејофот, кој претходно го држеа Сент Луис Хаукс против Минеаполис Лејкерс уште од далечната 1960 година. Ова е веќе четврта победа за Детроит оваа пролет во натпревари каде „ножот им е под грло“, откако во првата рунда направија епски пресврт од 3-1 против Орландо.
Кејд Канингем со 21 поен ја предводеше офанзивата, но вистинскиот клуч беше физичката игра во одбраната и нестварната клупа на Детроит, која ги надмудри резервите на Кливленд со неверојатни 48-19. Пол Рид додаде 17 поени, а Џален Дурен оствари дабл-дабл со 15 поени и 11 скокови.
Кај Кавалирс, кои го претрпеа првиот домашен пораз во овој плејоф, најефикасен беше Џејмс Харден со 23 поени, додека Донован Мичел и Еван Мобли постигнаа по 18. Кавалирс целосно се изгубија во агресивната одбрана на Пистонс, правејќи дури 20 изгубени топки, кои Детроит ги претвори во 28 лесни поени.
Одлучувачкиот седми натпревар се игра в недела навечер, а Детроит ќе ја има предноста на домашниот терен во потрага по конференциското финале.
