Една од најголемите голгетерски ери во поновата историја на Барселона официјално дојде до својот крај. Полскиот напаѓач Роберт Левандовски потврди дека по завршувањето на оваа сезона ќе го напушти каталонскиот гигант, а неделниот натпревар против Реал Бетис ќе биде неговиот последен танц пред преполните трибини на „Камп Ноу“.
37-годишниот голгетер оваа недела одржал емотивен говор пред своите соиграчи и стручниот штаб на тренингот, а во саботата преку социјалните мрежи ја сподели веста со јавноста со јасна порака: „Мисијата е исполнета“.
„Каталонија е моето место на земјата“
Левандовски заминува од Барселона по четири исклучително успешни години во кои успеа да освои три титули во Ла Лига и да биде клучниот фактор за враќањето на клубот на победничките патеки по тешкиот период и заминувањето на Лионел Меси.
„По четири години полни со предизвици и напорна работа, време е да продолжам понатаму. Заминувам со чувство дека мисијата е комплетна. Четири сезони, три шампионски титули. Никогаш нема да ја заборавам љубовта што ја добив од навивачите уште од првиот ден. Каталонија е моето место на земјата. Специјална благодарност до претседателот Лапорта кој ми даде шанса да го живеам најневеројатното поглавје во мојата кариера. Барса се врати таму каде што припаѓа“, напиша Левандовски во својата емотивна објава.
After four years full of challenges and hard work, it’s time to move on.
— Robert Lewandowski (@lewy_official) May 16, 2026
I leave with the feeling that the mission is complete. 4 seasons, 3 championships.
I will never forget the love I received from the fans from my very first days.
Catalonia is my place on earth.
Thank you… pic.twitter.com/xrggN3Gisv
Предводникот на Барса, Ханси Флик, со кого Левандовски соработуваше четири години (вклучувајќи ги и деновите во Баерн) и освои дури девет трофеи, потврди дека Полјакот утре ќе започне во стартниот состав бидејќи тоа апсолутно го заслужува. Флик го опиша како перфектен пример за помладите играчи и вистински професионалец од највисоко ниво.
Бројките на еден вистински „крал“ на шеснаесеттникот
Кога Барселона плати 50 милиони евра во 2022 година за да го доведе од Минхен, многумина беа скептични поради неговата возраст. Но, Левандовски ги замолкна критичарите. Зад себе остава нестварна статистика – 191 натпревар и дури 119 постигнати голови. Во неговата дебитантска сезона постигна 33 гола за титулата во Ла Лига, а минатата сезона со 42 погодоци беше главен архитект на домашната „триплета“.
Иако оваа сезона почесто беше на клупата (започна 15 меча во Ла Лига) бидејќи Флик во нападот го претпочиташе Феран Торес, Левандовски сепак постигна 18 голови на 44 меча во сите натпреварувања, помагајќи и на Барса успешно да ја одбрани титулата.
Каде продолжува Левандовски и кој е неговиот наследник?
Иднината на искусниот напаѓач, кој во август ќе наполни 38 години, сè уште не е дефинирана. Тој призна дека има опција за преселба во лига со понизок интензитет каде би можел да ужива во фудбалот и животот, но одлуката ќе ја донесе по истекот на договорот.
Од друга страна, за раководството на Барселона летово приоритет бр. 1 ќе биде носење на нова „деветка“. Како прва желба и примарна цел на Каталонците се споменува Хулијан Алварез од Атлетико Мадрид, иако преговорите со Јорганџиите ќе бидат пеколно тешки. На поширокиот список на Барса се наоѓаат и Виктор Осимен од Галатасарај, како и Жоао Педро од Челси, иако лондонскиот клуб веќе стави јасно до знаење дека Бразилецот не е за продажба.
