Претпоследното коло во англиската Премиер лига донесе вистински ролеркостер од емоции, историски достигнувања и драматични пресврти кои дополнително ја зовреа битката за излез во Европа. Додека на „Олд Трафорд“ се славеше нов епски рекорд и се лееја солзи за една заминувачка легенда, повратникот во елитата, Сандерленд, продолжува да ја живее својата фудбалска бајка. Одлучувачките 90 минути од сезоната ќе бидат вистинска војна, а во продолжение погледнете го комплетниот извештај од денешните возбудувања на Островот.
Манчестер Јунајтед 3-2 Нотингем Форест: Историски рекорд за Бруно и емотивно збогување со Каземиро!
Манчестер Јунајтед успеа да извојува исклучително важна победа во забавниот натпревар со пет гола на „Олд Трафорд“, со што дефинитивно го зацементира третото место на табелата под водство на привремениот менаџер Мајкл Карик. Натпреварот започна фуриозно за „ѓаволите“ со раниот гол на Лук Шо уште во 5-та минута, но Форест експресно одговори со погодокот со глава на Морато.
Сепак, вистинскиот центар на вниманието му припадна на капитенот Бруно Фернандеш. Португалецот испрати перфектен центаршут кој Брајан Мбеумо го претвори во гол за 3-1, со што Бруно стигна до својата 20-та асистенција сезонава во Премиер лигата. Со ова, тој се израмни со легендарните Тиери Анри и Кевин Де Брујне за рекордот по број на асистенции во една сезона.
Претходно, Матеус Куња постигна контроверзен гол кој ВАР долго го проверуваше за игра со рака, но судијата сепак ја потврди одлуката. Во финишот Гибс-Вајт намали на 3-2, но Форест немаше сили за бод. Најемотивниот момент се случи во 81-та минута кога култниот Каземиро излезе од игра со стоечки овации на својот проштален натпревар на „Олд Трафорд“, поздравен со солзи и аплаузи од целиот стадион.
Брентфорд 2-2 Кристал Палас: Ваторка во финишот го спаси Брентфорд, Палас во паника пред финалето!
Вистинска драма во Лондон каде Брентфорд успеа да извлече бод во самиот финиш, ремизирајќи 2-2 против Кристал Палас. Палас, кој за десет дена го игра големото финале во Конференциската лига, започна одлично откако Исмаила Сар погоди од пенал уште во втората минута. Брентфорд израмни со многу среќа во првиот дел кога една исфрлена топка со глава го погоди Данго Уатара во лицето и заврши во мрежата.
Во второто полувреме, Палас повторно поведе преку првиот гол на Адам Вортон, чиј удар по земја неспретно помина под телото на Келехер. Брентфорд тргна во тотална офанзива во финишот, а херој повторно беше Уатара, кој во 88-та минута со прецизен удар со глава со близина ги постави конечните 2-2.
„Пчелите“ остануваат на осмото место кое води во Европа, но вистинскиот кошмар е за менаџерот на Палас, Оливер Гласнер, кој во финишот поради повреди ги изгуби двајцата клучни дефанзивци – Шади Риад и Крис Ричардс, со што нивниот настап во европското финале е под сериозен знак прашалник.
Евертон 1-3 Сандерленд: „Спајдермен“ го запали Ливерпул, бајката на Сандерленд за Европа продолжува!
Повратникот во елитата, Сандерленд, продолжува со нестварните партии и на само едно коло до крајот се наоѓа на чекор до историски пласман во европските купови по цели 42 години пауза! „Црните мачки“ со фантастичен пресврт во второто полувреме го совладаа Евертон во Ливерпул со 3-1. Домаќините водеа на полувремето со автоголот на Гранит Џака, но во вториот дел на теренот постоеше само еден тим.
Брајан Броби најави израмнување по одличната асистенција на Енцо Ле Фе, а во 81-та минута самиот Ле Фе погоди за целосен пресврт и водство од 2-1. Французинот предизвика делириум на трибините откако голот го прослави ставајќи црна маска на „Спидермен“, која му ја фрли еден од навивачите. Конечните 3-1 ги постави Вилсон Исидор во судиското продолжение.
Овој пораз донесе тажен крај за легендарниот капитен на Евертон, Шејмус Колеман, кој по 17 години верност го одигра својот 434-ти и последен меч за клубот, напуштајќи го теренот со почесен шпалир од соиграчите.
Лидс 1-0 Брајтон: Калверт-Луин во 96-та минута му зададе кобен удар на Брајтон!
Нестварна драма се случи на „Еланд Роуд“ каде Лидс Јунајтед со својот единствен шут во рамките на голот во 96-та минута успеа да го собори Брајтон со 1-0. „Галебите“ беа апсолутно доминантен тим во текот на целиот натпревар, упатија дури 19 удари кон противничкиот гол, но беа немилосрдно казнети за своите колосални промашувања.
Кога сите очекуваа натпреварот да заврши без голови, дефанзивецот на Брајтон, Ван Хеке, направи катастрофална грешка и испрати премногу слаба повратна топка кон својот голман. Искусниот Доминик Калверт-Луин експресно ја пресретна топката, вешто го заобиколи Вербруген и ја смести во празната мрежа за свој 14-ти гол сезонава и тотално лудило на трибините.
Овој пораз е болен удар за европските амбиции на Брајтон, кој сега има само бод предност пред Брентфорд и два пред Сандерленд на едно коло пред крајот на првенството.
Вулверхемптон 1-1 Фулам: Робинсон со деби-гол ги угаси европските соништа на Марко Силва
Екипата на Фулам и дефинитивно ги загуби сите математички шанси за излез во Европа, откако на гостински терен одигра само 1-1 против веќе отпишаниот Вулверхемптон, кој се збогува со елитата и се сели во Чампионшип по осум години поминати во Премиер лигата.
„Волците“ успеаја да поведат во 25-та минута кога по одличниот центаршут на Родриго Гомеш, Хванг ја смири топката за Матеус Мане, кој со силен и прецизен удар од работ на шеснаесетникот донесе 1-0. Фулам успеа да израмни во судиското продолжение од првиот дел.
По долга ВАР-проверка за фаул на Мане врз Кастањ, судијата покажа на белата точка, а Антони Робинсон ладнокрвно погоди за 1-1, што за него беше прв гол во Премиер лигата во кариерата. Во второто полувреме Вулверхемптон ги имаше најдобрите шанси, вклучувајќи ја и стативата на Армстронг, па на крајот натпреварот заврши со гласни свирежи од незадоволните навивачи на двете страни.
