Најдобриот играч на актуелниот шампион Оклахома Сити Тандер, Шеј Гилџус-Александер (СГА), и официјално е прогласен за Најкорисен играч (МВП) во НБА лигата за сезоната 2025/26. Ова е втора последователна МВП титула за канадскиот кошаркар, со што тој стана 18-тиот кошаркар во историјата со најмалку две вакви признанија и дури 14-тиот кој успеал да ги освои две во низа.
Канаѓанецот ја прослави престижната награда во тренинг центарот на Оклахома опкружен со своите соиграчи, на кои како подарок за поддршката им купи нови луксузни мантили од брендот „Burberry“.
„Кошарката е тимски спорт. Сите бројки, сите признанија и сè што правам на теренот немаше да вреди ништо ако победевме на само 10 натпревари сезонава. Затоа, бескрајно ви благодарам момци, ве сакам“, изјави Гилџус-Александер за време на тимската прослава.
Целосна доминација на интернационалците и уривање на рекорди
Триумфот на Шеј ја продолжи апсолутната доминација на кошаркарите родени надвор од САД. Ова е осма година по ред како МВП наградата завршува кај интернационален играч. Низата ја започна Јанис Адетокумбо (2019, 2020), продолжи со Никола Јокиќ (2021, 2022), Џоел Ембид (2023), па повторно Јокиќ (2024), пред Гилџус-Александер целосно да завладее во 2025 и 2026 година.
Интернационалците комплетно го окупираа подиумот петта сезона по ред, со оглед на тоа што Никола Јокиќ заврши како втор во гласањето, а француската сензација Виктор Вембањама на третото место. Гилџус-Александер доби убедливи 83 од вкупно 100 гласови за прво место.
Канаѓанецот зад себе остави уште една индивидуално брутална сезона. Тој беше втор стрелец во лигата со просек од 31.1 поен по натпревар (зад Лука Дончиќ со 33.5), а воедно ја продолжи својата нестварна НБА рекорд-низа од 140 последователни натпревари во регуларниот дел со најмалку 20 постигнати поени, серија која ќе ја пренесе и во следната натпреварувачка година. Покрај МВП признанието, Шеј сезонава ја освои и наградата за најдобар играч „во клучните моменти“ во лигата (Clutch Player of the Year), добивајќи дури 96 од 100 гласови за неговите перформанси во последните пет минути од неизвесните мечеви.
Проклетството на трипл-дабл просекот на Јокиќ
Фактот што Никола Јокиќ не ја освои наградата продолжи еден чуден НБА тренд. Имено, играчите кои ја завршуваат сезоната со трипл-дабл просек, што се смета за „светиот грал“ на кошарката, речиси никогаш не го добиваат МВП признанието.
Српскиот центар ја заврши сезоната со неверојатни 27.7 поени, како и најдобри во лигата 12.9 скокови и 10.7 асистенции по натпревар, што е дури седми пат во историјата еден кошаркар да има ваков просек. Сепак, тоа не беше доволно за гласачите. Расел Вестбрук четири пати имаше ваков просек, а победи само еднаш, Оскар Робертсон во 1962 година воопшто не ја доби наградата, а Јокиќ сега по вторпат во кариерата остварува ваков сезонски ефект без притоа да го подигне МВП трофејот (иако во витрините има три други признанија).
Шеј Гилџус-Александер нема време за преголемо славење. Веќе вечерва, во Оклахома Сити започнува финалната серија на Западот каде Тандер се соочува со Сан Антонио Спарс на Виктор Вембањама. Пред почетокот на мечот, комесарот на НБА, Адам Силвер, лично ќе му го врачи МВП трофејот на Шеј – што ќе биде негов трет голем пехар во последните 12 месеци, по ланското МВП признание и МВП трофејот од големото НБА финале во јуни.
Следете нè: Facebook | Instagram | X
