Селекторот на португалската репрезентација, Роберто Мартинез, денеска и официјално го објави списокот од 27 фудбалери кои ќе патуваат на претстојното Светско првенство во Северна Америка. Очекувано, главната вест на Пиринеите е вклучувањето на 41-годишниот Кристијано Роналдо, кој се подготвува за својот рекорден шестти Мундијал во кариерата.
Ова првенство ќе биде емотивно и исклучително специфично за Португалците. Мартинез на прес-конференцијата нагласи дека целиот тим ќе игра со мислите насочени кон нивниот поранешен соиграч Диого Жота, кој трагично го загуби животот во сообраќајна несреќа во Шпанија минатата година. Португалија пристигнува во Америка со огромни амбиции по перфектните квалификации и освоената Лига на нации, но Мартинез веднаш ги спушти топката и притисокот на земја.
„Влегуваме во тотално непозната територија. Проширениот Мундијал со 48 репрезентации ќе бара нереална издржливост од играчите, бидејќи распоредот е многу подолг и се игра во три различни земји. Сè што направивме досега ни купува само три натпревари во групната фаза. Таму се бришат сите претходни реномеа и секој мора да го докаже својот квалитет под било какви околности“, предупреди Мартинез.
Последниот мундијалски танц на Роналдо
За Кристијано Роналдо ова дефинитивно ќе биде последен обид да стигне до единствениот голем трофеј што му недостасува во неговата богата кариера. Ова воедно е и негов прв голем турнир откако го напушти европскиот фудбал за да се пресели во Саудиска Арабија. Роналдо веќе е апсолутен рекордер во машкиот репрезентативен фудбал со 226 настапи и 143 голови за својата земја, а со евентуален погодок во Америка ќе го подобри сопствениот рекорд како единствен играч кој стрелал на шест различни светски првенства.
Покрај ветеранот, Мартинез во офанзивната линија собра вистински „крем“ од фудбалери, каде друштво ќе му прават клупскиот колега од Ал Наср, Жоао Феликс, ѕвездата на Милан, Рафаел Леао, како и Франсиско Консеисао од Јувентус и Педро Нето од Челси. Средниот ред ќе биде диктиран од Бруно Фернандес (Манчестер Јунајтед) и Бернардо Силва (Манчестер Сити), додека одбраната ја предводи Рубен Дијас.
Levanta-se o “pano”: eis o nosso 𝗻𝗼𝘃𝗼 𝗱𝗿𝗲𝘀𝘀 𝗰𝗼𝗱𝗲. ❤️🔥🌊🇵🇹
— Portugal (@selecaoportugal) March 24, 2026
🔗 𝗝𝗮́ 𝗱𝗶𝘀𝗽𝗼𝗻𝗶́𝘃𝗲𝗹 👉 https://t.co/ikBvVapq65#VaiDarPortugal | @pumafootball pic.twitter.com/nxlW5utAvS
Комплетниот состав на Португалија за СП 2026:
Голмани: Диого Коста (Порто), Жозе Са (Вулверхемптон), Руи Силва (Спортинг Лисабон), Рикардо Велхо (Генчлербирлиги)*.
Одбрана: Рубен Дијас (Манчестер Сити), Жоао Кансело (Барселона), Диого Далот (Манчестер Јунајтед), Нуно Мендес (ПСЖ), Нелсон Семедо (Фенербахче), Матеус Нунес (Манчестер Сити), Гонсало Инасио (Спортинг Лисабон), Ренато Веига (Виљареал), Томас Араухо (Бенфика).
Среден ред: Бруно Фернандес (Манчестер Јунајтед), Бернардо Силва (Манчестер Сити), Витиња (ПСЖ), Жоао Невес (ПСЖ), Рубен Невес (Ал Хилал), Саму Коста (Мајорка).
Напад: Кристијано Роналдо (Ал Наср), Рафаел Леао (Милан), Жоао Феликс (Ал Наср), Гонсало Рамос (ПСЖ), Педро Нето (Челси), Франсиско Консеисао (Јувентус), Гонсало Гедеш (Реал Сосиедад), Francisco Trincão (Спортинг Лисабон).*Забелешка: Голманот Рикардо Велхо е повикан како 27-ми фудбалер кој ќе му помага на тимот исклучиво за тренинг процесот.
Португалија се наоѓа во групата К каде за противници ги има селекциите на Колумбија, Узбекистан и Конго. Избраниците на Роберто Мартинез ја отвораат мундијалската кампања на 17 јуни во Хјустон против Конго. По разочарувачката елиминација од Мароко во четвртфиналето во Катар, Португалците се подготвени за поправен испит и напад на историскиот прв светски трон.
