Кошаркарски земјотрес го потресе Тексас откако Далас Маверикс официјално објавија дека ги разделуваат патиштата со шефот на стручниот штаб, Џејсон Кид. Ова означува ненадеен и предвремен крај на петгодишниот мандат на клупската легенда, кој во 2024 година ја предводеше франшизата до големото финале во НБА лигата каде загуби од Бостон Селтикс.
Кид го напушта Далас со апсолутно изедначен биланс од 205 победи и 205 порази, оставајќи зад себе период исполнет со огромни успеси, но и со контроверзи кои комплетно ја уништија тимската хемија во последната година.
Колапс по епскиот трејд на Лука Дончиќ
Иако Кид имаше фантастичен старт на својата менаџерска кариера во Далас по доаѓањето во 2021 година, ситуацијата во Тексас драстично ескалираше и тргна низ брдо по шокантниот трејд на Лука Дончиќ во Лос Анџелес Лејкерс во февруари 2025 година. Само осум месеци по играњето во НБА финалето, Далас го загуби својот заштитен знак.
Поранешниот генерален менаџер Нико Хирсон беше означен како главна фигура зад овој трејд, но влијателни гласови во клубот, вклучувајќи го и малцинскиот сопственик Марк Кубан, јавно го обвинија Кид дека имал многу поголемо влијание врз заминувањето на Дончиќ отколку што признаваше. Кид се бранеше дека дознал за зделката во „пет до дванаесет“, но сомнежот остана да лебди во соблекувалната.
Проклетството на повредите и чистката на Масаи Уџири
По заминувањето на Дончиќ, Далас се соочи со вистинско проклетство. Ентони Дејвис, кој пристигна како замена, се повреди уште на првиот натпревар, а набрзо потоа Кaјри Ирвинг ги оштети предните вкрстени кончеви на коленото. Со десеткуван тим, Маверикс загубија дури 30 од последните 37 натпревари во регуларниот дел од сезоната.
Конечниот пресврт пристигна со назначувањето на прекалениот и докажан функционер Масаи Уџири за нов претседател на кошаркарските операции. Иако Кид минатиот октомври потпиша богат четиригодишен договор вреден 40 милиони долари, Уџири реши комплетно да расчисти со минатото и да започне нова насока за тимот, градејќи го проектот околу 19-годишниот Купер Флег, кој штотуку беше прогласен за „Дебитант на годината“ во НБА. Уџири доби целосна контрола од сопственикот Патрик Димонт да го преуреди Далас по своја мерка, а првата „жртва“ на таа брутална чистка е токму Џејсон Кид.
