Иднината на Макс Верстапен во Формула 1 веќе не изгледа толку несигурна. По сериозните критики што ги упати по трката во Јапонија, каде што отворено призна дека размислува за заминување од падокот поради револуционерните, но фрустрирачки хибридни мотори, четирикратниот светски првак во Монтреал конечно испрати позитивни сигнали. Причината за овој уреднички пресврт се итните реформи во техничкиот правилник кои ФИА и тимовите ги подготвуваат по притисокот од самите возачи.
Пропадна ли „коцката“ со хибридниот сооднос 50-50?
Овогодишната сезона во најбрзиот спорт донесе сериозни главоболки на патеките. Наместо чисто тркање и брзина, возачите беа принудени брутално да ја менаџираат енергијата за време на секој круг. Актуелниот сооднос на моќност, кој е поделен на половина помеѓу класичниот мотор со внатрешно согорување и електричната батерија, се покажа како деструктивен за самиот спорт. Болидите буквално „умираа“ и губеа брзина на средината од долгите прави линии во моментите кога батеријата влегуваше во режим на полнење.
Токму затоа, ФИА и производителите во Канада водат интензивни преговори за промена на филозофијата. Начелниот план е да се зголеми протокот на гориво и да се врати доминацијата на класичниот мотор со внатрешно согорување, со што електричната компонента ќе падне во втор план.
За Верстапен, ова е клучниот услов за да го продолжи својот престој во Формула 1. Холанѓанецот јасно стави до знаење дека не му е важен само брзиот болид, туку квалитетот на „производот“ во кој се натпреварува. Најавените промени за зголемување на класичната моќност според него се чекор во вистинската насока кој 2026 година ќе ја направи далеку позабавна за возење. Иницијативата експресно ја поддржаа и актуелниот шампион Ландо Норис и Џорџ Расел, кои се согласија дека е недозволиво болидите вештачки да губат половина од моќноста на патеката.
„Тоа ќе го направи самиот производ подобар, а тоа значи дека јас ќе бидам посреќен. Токму тоа го сакам – да можам да продолжам и да настапувам на највисоко ниво. Среќен сум каде што се наоѓам и гледам дека тимот навистина напредува, што е возбудливо. Секогаш сакав да продолжам, но сакав да видам промени. Ова што доаѓа е дефинитивно многу позитивно и нè враќа речиси во нормала“, изјави Верстапен на прес-конференцијата во Канада.
Нирбургринг како издувен вентил и лекција по издржливост
Колку на Верстапен му е преку глава од електричните ограничувања и комплицираните Ф1 правила покажа и неговиот излет минатиот викенд на легендарната патека Нирбургринг. Четирикратниот првак во Формула 1 дебитираше на култната трка „24 часа Нирбургринг“, каде уште еднаш ги демонстрираше своите нестварни возачки способности во променливи и екстремно влажни услови.
Неговиот тим имаше целосна контрола над трката и се наоѓаше на прагот на епска победа во издржливост, пред механички дефект на погонското вратило на само три часа пред крајот брутално да го прекине шампионскиот сон. И покрај разочарувачкиот крај поради кој остана без трофеј, Верстапен призна дека целото искуство во ендуранс трките му донело огромно уживање и вети дека сигурно ќе се врати на Нирбургринг во иднина бидејќи неговата единствена цел таму е победа.
„Имав неколку дена да го процесирам тоа. Генерално, зад мене е прекрасна недела во која уживав во секој момент. Ова беше моја прва голема ендуранс трка, сè одеше совршено и ја имавме контролата во наши раце. За жал, ова е механички спорт и дефектот нè чинеше победа. Но, целото искуство на возење во влажни и променливи услови, како и споделувањето на болидот со тимските колеги е нешто неверојатно. Сакам да победам таму, па дефинитивно ќе се вратам повторно штом Ф1 обврските ќе ми го дозволат тоа“, порача Верстапен.
Преговорите во Монтреал продолжуваат во текот на целиот викенд. На маса се комплицирани прашања околу буџетскиот лимит на тимовите кои треба експресно да ги развијат новите спецификации на моторите, но најважно од сè е што гласот на возачите конечно почна да се почитува.
