По натпреварот против Филаделфија Унион, во светските спортски (а и македонски) медиуми експресно се рашири лавина од драматични вести. Откако Лео Меси мораше предвреме да го напушти теренот поради физичка непријатност, социјалните мрежи и порталите беа преплавени со црни сценарија, а многумина веднаш побрзаа да објават дека се работи за тешка повреда и дека аргентинскиот волшебник дефинитивно ќе го пропушти претстојното Светско првенство во Јужна Америка.
Ние во Спортска Станица свесно одлучивме да не ги пренесуваме овие непроверени гласини и панични шпекулации, верувајќи дека во вакви моменти професионалноста налага да се почекаат потврдените извори или официјалните медицински извештаи. Токму тоа се случи во раните утрински часови денес.
Медицински прегледи во Мајами: Се работи за мускулен замор
Медицинскиот тим на Интер Мајами ги соопшти резултатите по деталните прегледи направени во текот на вчерашниот ден. За среќа на Аргентина и на милионите фанови ширум светот, првичната дијагноза е далеку побенигна од она што се шпекулираше во јавноста.
Станува збор за преоптоварување поврзано со мускулен замор во неговата лева ложа, што е сосем нормално со оглед на згуснатиот распоред и напорите во изминатиот период.
„По извршените дополнителни медицински тестови овој понеделник, првичната дијагноза укажува на преоптоварување поврзано со мускулен замор во левата ложа. Временската рамка за неговото враќање на физичките активности ќе зависи од неговиот клинички и функционален напредок“, се вели во официјалното соопштение на Интер Мајами.
Мундијалот не е загрозен – Аргентина може да здивне
Оваа потврда јасно става до знаење дека не станува збор за никакво кинење на мускулот или тешка повреда која бара повеќемесечна пауза. Враќањето на Меси на теренот ќе биде внимателно мониторирано во следните денови.
Ова се фантастични вести пред сè за селекторот Лионел Скалони и за репрезентацијата на Аргентина, бидејќи капитенот ќе има сосем доволно време да го одмори своето тело, целосно да закрепне и максимално подготвен да ја предводи својата земја во одбрана на светскиот трон.
