Во светот на фудбалот сме навикнати големите ѕвезди да добиваат мурали, статуи или улици со нивното име, но Банката на Шкотска реши да оди чекор подалеку. Фудбалерот на Наполи и шкотски репрезентативец, Скот Мектоминеј, ја доби највисоката можна чест во својата татковина – неговиот лик се најде на специјална, лимитирана едиција на банкнотата од 20 фунти!
Овој уникатен потег е инспириран од еден од најголемите моменти во модерната спортска историја на Шкотска, момент кој ја врати „Тартан армијата“ на светската мапа.
Историски „ножички“ кои го срушија 28-годишното проклетство
Дизајнот на банкнотата го овековечува фасцинантниот погодок со „ножички“ кој Мектоминеј го постигна во ноември минатата година на култниот „Хемпден Парк“. Во таа незаборавна ноќ, Шкотска ја совлада Данска со 4-2, а токму акробатскиот потег на Мектоминеј беше клучниот момент кој ѝ ја донесе на нацијата првата квалификација за Светско првенство по пауза од долги 28 години (уште од Мундијалот во Франција 1998 година).
Овој гол експресно стана дел од шкотскиот фудбалски фолклор, а сега е буквално втиснат во националната валута.
„Ваквите моменти им припаѓаат на сите што го следат и бодрат тимот, па да го видам мојот гол на шкотска банкнота е навистина неверојатно чувство. Ова е нешто исклучително специјално за мене“, изјави емотивниот Мектоминеј кој зад себе има одлична сезона во Серија А со Наполи.
“It’s a bit surreal to be honest”
— Sky Sports Football (@SkyFootball) May 26, 2026
Scott McTominay reacts to having his bicycle kick honoured by the Bank of Scotland on a £20 note 🤩 pic.twitter.com/GiX6hUWwJD
Хуманост пред сè: Борба против бездомништвото
Издавањето на оваа банкнота има и силна хуманитарна позадина. Банката на Шкотска изработи само 100 вакви уникатни примероци. Од нив, 50 банкноти ќе ѝ бидат достапни на пошироката јавност преку колекционерски аукции и специјална наградна игра која ќе трае до 26 јуни.
Сите собрани средства од оваа иницијатива ќе бидат донирани во „Crisis Scotland“, добротворна организација посветена на справувањето со бездомништвото во земјата.
„Да работам со Банката на Шкотска и да го претвориме овој гол во нешто што ќе ѝ помогне на организацијата Crisis во нивната борба против бездомништвото, ме прави уште погорд“, додаде шкотскиот репрезентативец, кој сега покажа големина и надвор од терените.
Ема Нобл, претседателката на извршниот комитет на Банката на Шкотска, потенцираше дека голот на Скот веќе е врежан во ДНК-та на нацијата како еден од најголемите во историјата, и дека за нив било вистинска привилегија да го оживеат овој момент на еден ваков уникатен начин.
