Еден од трите домаќини на Светското првенство 2026 година, селекцијата на САД, со вистински телевизиски спектакл во Њујорк официјално го претстави списокот од 26 фудбалери кои ќе го носат националниот дрес на претстојниот Мундијал.
На гламурозната церемонија одржана на „Пиер 17“ во Менхетен, со култниот Бруклински мост во позадина, американските фудбалери облечени во елегантни костуми излегоа пред јавноста за да го најават почетокот на историското фудбалско лето. Селекторот Маурисио Покетино направи микс од докажани европски ѕвезди, но не изостанаа ниту големите изненадувања и контроверзии.
Hit the gas. No stopping.
— U.S. Soccer Men’s National Team (@USMNT) May 26, 2026
🎶 “Won’t Stop” by Gunna pic.twitter.com/XSCKK6DxRY
Европската елита го предводи тимот, Ричардс отсутен поради финале
Главниот товар на американската репрезентација ќе падне врз плеќите на фудбалерите кои настапуваат во најсилните европски лиги. Нападот и креацијата се резервирани за ѕвездата на Милан, Кристијан Пулишиќ, заедно со Вестон Меккени (Јувентус) и Тимоти Веа (Марсеј), додека стабилноста во средината ќе ја диригира Тајлер Адамс од Бормунт.
„За мене, да имам можност да играм на Светско првенство дома, и да го најавиме сето ова тука во мојот роден Њујорк, е нешто екстремно специјално. Да погледнам во публиката и да им вратам нешто на овие луѓе и на оваа неверојатна земја ќе биде остварување на сонот“, изјави Адамс, кој беше капитен на тимот во Катар пред четири години.
Единствениот фудбалер кој не присуствуваше на церемонијата во Њујорк беше дефанзивецот Крис Ричардс. Тој се јави преку видео-врска од Лондон, бидејќи со неговиот Кристал Палас се подготвува за утрешното финале во Конференциската лига на УЕФА, и покрај тоа што влече незгодна повреда на скочниот зглоб.
Случајот „Рејна“: Талентот поважен од минутажата и скандалите
Убедливо најголемо внимание и дебата во јавноста предизвика вклучувањето на Џио Рејна. 23-годишниот офанзивец зад себе има очајни сезони со само 1.835 одиграни минути во изминатите три години (за Дортмунд, Менхенгладбах и Нотингем Форест), постигнувајќи само три гола.
Уште поконтроверзно е неговото минато во националниот тим. По Светското првенство во Катар 2022, изби огромен скандал откако тогашниот селектор Грег Берхалтер речиси го избрка од кампот поради лош однос. Тоа резултираше со одмазда од семејството Рејна, кое во федерацијата пријави физички инцидент на Берхалтер од далечната 1991 година. Иронијата да биде поголема, на овој мундијалски список на Покетино, покрај Рејна се најде и синот на поранешниот селектор, Себастијан Берхалтер.
Сепак, Покетино застана во одбрана на својата одлука, нарекувајќи го Рејна „специјална ситуација поради неговиот огромен и несекојдневен талент“. Од списокот, поради лоша форма и повреди, извиснаа Танeр Тесман од Лион и Диего Луна.
Распоред: Прв тест против Парагвај
САД пред почетокот на Мундијалот ќе одигра два силни контролни натпревари против Сенегал (1 јуни во Шарлот) и Германија (6 јуни во Чикаго). Својот пат во Групата Д на Светското првенство го започнуваат на 12 јуни на спектакуларниот „СоФај“ стадион во Лос Анџелес против Парагвај, по што следуваат дуелите со Австралија (19 јуни) и Турција (25 јуни).
КОМПЛЕТНИОТ СОСТАВ НА САД ЗА СП 2026:
Голмани: Крис Брејди (Чикаго Фајр), Мет Фрис (Њујорк Сити), Мет Тарнер (Њу Ингланд Револушн).
Одбрана: Макс Арфстен (Колумбус Кру), Сержињо Дест (ПСВ Ајндховен), Алекс Фриман (Виљареал), Марк Мекензи (Тулуз), Тим Рим (Шарлот), Крис Ричардс (Кристал Палас), Ентони Робинсон (Фулам), Мајлс Робинсон (Синсинати), Џо Скали (Борусија Менхенгладбах), Остон Трасти (Селтик).
Средина: Тајлер Адамс (Бормунт), Себастијан Берхалтер (Ванкувер Вајткепс), Вестон Меккени (Јувентус), Кристијан Ролдан (Сиетл Саундерс), Бренден Аронсон (Лидс Јунајтед), Кристијан Пулишиќ (Милан), Џио Рејна (Борусија Менхенгладбах), Малик Тилман (Баер Леверкузен), Тимоти Веа (Марсеј), Алехандро Зендехас (Клуб Америка).
Напад: Фоларин Балогун (Монако), Рикардо Пепи (ПСВ Ајндховен), Хаџи Рајт (Ковентри Сити).
