Вистинскиот знак на големите шампиони е способноста да победуваат дури и тогаш кога не го играат својот најдобар тенис. Новак Ѓоковиќ уште еднаш го потврди ова правило на Централниот терен, каде по голема тричасовна борба успеа да го скрши отпорот на незгодниот Французин Артур Риндеркнеч со 7-5, 6-4, 1-6, 7-6(4) и да обезбеди пласман во четвртото коло.
Од сигурно водство до редок шок во третиот сет
Мечот започна според планираното за седумкратниот шампион. Ѓоковиќ со искусно темпирање на брејковите ги доби првите два сета со 7-5 и 6-4, контролирајќи ги размените од основната линија. Но, кога сите очекуваа рутинска завршница, Риндеркнеч ги активираше своите „бомби“ од сервис.
Во третиот сет Французинот направи неверојатна серија и поведе со 5-0. Навивачите на Централниот терен беа во шок пред можноста Ѓоковиќ за првпат во својата кариера да претрпи „компир“ (6-0) на тревната подлога. Српскиот ас сепак го „избегна куршумот“ и го зеде почесниот гем, но сетот експресно му припадна на Риндеркнеч со убедливи 6-1.
Драма во тај-брејкот и пад на тревата
Четвртиот сет донесе рамноправна и исклучително тензична борба. Риндеркнеч продолжуваше немилосрдно да сервира, додека Ѓоковиќ чекаше своја шанса. Одлуката падна во „13-тиот гем“, каде искуството на Новак повторно излезе на виделина за конечни 7-4 во тај-брејкот.
Колку беше исцрпувачка самата завршница најдобро опиша последната финална точка – по фантастичен поен и двајцата тенисери завршија легнати на тревата на Централниот терен, но Новак беше првиот кој стана за да ја прослави својата 105-та јубилејна победа на Вимблдон.
Следен противник
На патот кон четвртфиналето, пред Новак Ѓоковиќ стои рускиот квалификант Роман Сафиулин. Сафиулин денес одигра брилијантен меч и во три сета ја елиминираше младата тениска сензација во подем, Жоао Фонсека.
