Новак Ѓоковиќ уште еднаш го потврди својот статус на вистински владетел на тениските терени, пласирајќи се во своето 17-то четвртфинале на Вимблдон. Српскиот ас во осминафиналната фаза успеа да го скрши отпорот на жилавиот руски квалификант Роман Сафиулин, победувајќи го со 3-1 во сетови (7-6(6), 6-3, 3-6, 6-3) по три часа и 26 минути игра на Централниот терен.
Со овој триумф, Ѓоковиќ стигна до својата 106-та победа на Вимблдон, со што официјално го престигна Роџер Федерер по бројот на машки сингл победи на престижниот лондонски гренд слем. Пред него на вечната листа сега останува уште само Мартина Навратилова.
Преживеј за да напредуваш
Мечот против Сафиулин започна со брз брејк за Србинот, но Русинот експресно се врати во игра и го одведе првиот сет во неизвесен тај-брејк. Таму до израз дојде менталната сила на Ѓоковиќ, кој немаше милост во клучните поени. По рутински освоениот втор сет, кај Новак се појави нервоза предизвикана од силниот ветер. Поради гласно пцуење на српски јазик, тој заработи и предупредување од судијата, а падот во играта го искористи Сафиулин за да намали на 2-1 во сетови. Сепак, во четвртиот сет Ѓоковиќ експресно поведе со 3-0 и мирно го приведе мечот кон крајот.
Ова е вкупно 66-то Гранд Слем четвртфинале во кариерата на Новак Ѓоковиќ, остварено во неговиот 83-ти настап на големите турнири.
„Преживеј за да напредуваш. Така се чувствувам моментално. Се надевам дека најдобриот тенис допрва доаѓа“, изјави Ѓоковиќ по мечот.
Синер не дозволи изненадување
Јаник Синер продолжува со сигурните партии во Лондон и покажа дека одлично се чувствува на Централниот терен. Италијанецот без поголеми проблеми го совлада јапонскиот квалификант Шинтаро Мочизуки, кој е на 151-то место на АТП листата.
Синер ја заврши работата за два часа и 25 минути, славејќи со максимални 6-3, 7-6(0), 6-3. Негов следен противник во битката за полуфинале ќе биде искусниот германски тенисер Јан-Леннард Штруф.
Четири и пол часовна драма на Теренот бр. 1
Противник на Новак Ѓоковиќ во четвртиот круг ќе биде Феликс Оже-Алијасим, кој го доби епскиот маратон против Алехандро Давидович Фокина. Канадскиот тенисер славеше по четири и пол часа вистински тениски ролеркостер со 6-7(4), 7-6(6), 6-3, 6-7(2), 6-1.
Мечот понуди неверојатни пресврти. Оже-Алијасим испушти две меч-топки во четвртиот сет, по што Шпанецот, и покрај тоа што во еден момент доживеа незгодна повреда на зглобот, успеа да се избори за петти одлучувачки сет. Сепак, во финалниот дел од мечот Фокина остана без сили, па Канаѓанецот со ас ја искористи својата седма меч-топка за конечен триумф. Средбата заврши со прилично ладно ракување на мрежата поради претходни тензии во текот на играта.
One of the best points… ever? pic.twitter.com/lFp2HIuy0j
— José Morgado (@josemorgado) July 5, 2026
