Некогашниот тренер на Барселона и шпанска фудбалска легенда, Чави Ернандез, не штеди зборови кога станува збор за најголемиот светски талент во моментов. Во ексклузивна колумна за престижниот „The Athletic“, Чави открива фасцинантни детали за фудбалското созревање на Ламин Јамал, играчот кому лично му даде деби во првиот тим на Каталонците. Според Чави, осумнаесетгодишниот офанзивец е подготвен да ја преземе круната во светскиот фудбал.
Чудо од дете со „ладно срце“ кое не прави грешки
Чави за првпат го забележал Јамал преку видео-снимка од младински натпревар кога момчето имало само 15 години. По импресивната партија со гол и две асистенции, тренерот веднаш побарал да го приклучи кон првиот тим. Иако раководството (Матеу Алемани и Жорди Кројф) сугерирале да се почека бидејќи тинејџерот немал професионален договор, Чави инсистирал тој барем да тренира со сениорите.
„Она што најмногу ме изненади е што на 15 години тој речиси и да не правеше грешки. Носеше одлични одлуки. Момчето едноставно не се плашеше од ништо. Како тренер, кога ќе ставите рака на грбот на дебитант, можете да му го почувствувате срцето како лудо чука од трема. Кај него немаше ништо, како срцето воопшто да не му чукаше. Тогаш си реков: Овој дечко е неверојатно смирен“, се присетува Чави за „The Athletic“.
Официјалниот наследник на Лионел Меси
Споредбите со Меси се неизбежни, не само поради позицијата на десното крило и играта со лева нога, туку и поради менталитетот. Чави истакнува дека Лионел Меси неодамна и самиот го посочил Јамал како свој легитимен наследник во фудбалскиот свет, нешто што на тинејџерот воопшто не му создава притисок.
„Тој ужива во предизвиците. На тренинзите редовно се обложувавме кој ќе даде повеќе голови од слободен удар, а кога ќе го испровоцирав, тој стануваше уште подобар. Видете што се случи на ЕВРО 2024 кога Рабио го провоцираше – Јамал излезе и постигна спектакуларен гол. Тој е како Меси во смисла дека знае колку е добар и знае дека е поинаков од сите останати“, додава легендарниот Шпанец.
Џокерот кој ѝ недостасуваше на Шпанија
Чави потенцира дека низ историјата, Шпанија секогаш имала врвни играчи кои биле подредени на колективот (како Иниеста, Силва, Виља), но никогаш немала индивидуалец со карактеристики на Мбапе, Дембеле или Сака – играч кој самостојно може да издрибла тројца-четворица дефанзивци и да реши натпревар.
Освен неспорниот талент, огромна разлика прави и неговиот физички развој. Кога дебитирал имал само 1.73 метри, додека сега Јамал е висок 1.85 метри, додавајќи експлозивна брзина и сила кон својата техника.
„Следните 15 до 20 години му припаѓаат нему, доколку тој го сака тоа. Тој е џокерот кој ја прави Шпанија главен фаворит на овој Мундијал. Веќе е меѓу најдобрите пет играчи на планетата, а доколку го освои Светското првенство, дефинитивно ќе биде сметан за апсолутно најдобар во светот“, заклучува Чави.
