Светската фудбалска организација (ФИФА) подготвува финансиска револуција која може трајно да го промени сопственичкиот пејзаж на најважната споредна работа на светот. Во обид вртоглаво да ги зголеми приходите, ФИФА објави план за продажба на голем малцински удел во целосно нова компанија која ќе биде задолжена за водење на нејзините главни настани, вклучувајќи ги Светското првенство и Светското клупско првенство.
Мрежа од милијарди и политички врски
Предлогот, кој допрва треба да биде одобрен од мнозинството национални асоцијации и 37-члениот совет на ФИФА, предвидува создавање на нов ентитет наречен FIFA Forward Enterprises (FFE) кој ќе ги преземе сите комерцијални операции. Светската куќа на фудбалот планира да продаде до 21 отсто од оваа компанија на приватни инвеститори, со очекување да инкасира 4.2 милијарди долари.
Овие средства инстантно би биле ослободени кон членките преку новата програма наречена FIFA Fast-Forward Programme (FFFP), со што ФИФА би го триплирала износот на пари за развој кој го доделува на 211 национални федерации. Според планот, секоја асоцијација би добила по 20 милиони долари како грант во следниот четиригодишен циклус, сума која би се зголемила на 24 милиони долари до периодот 2035-38 година.
Главниот советник на проектот е глобалната банка JP Morgan, додека групата на инвеститори се очекува да биде предводена од Thrive Eternal. Станува збор за инвестициски фонд основан од Џошуа Кушнер, кој е брат на Џаред Кушнер – зетот на Доналд Трамп. Инфантино овој финансиски маневар го нарекува „демократизација на светскиот фудбал“ со цел комерцијалната вредност да се сподели порамномерно низ светот.
Интересно е што сето ова се подготвува во момент кога ФИФА веќе бележи незапаметени приходи, со очекувана заработка од 15 милијарди долари за актуелниот четиригодишен циклус. Воедно, ФИФА ги демантираше шпекулациите дека Инфантино би земал плата од 64 милиони долари за водење на новата компанија, иако потврдија дека тој „мора да има водечка улога“ во неа.
УЕФА во директна војна: Фудбалот не е за продажба!
Ваквиот чекор експресно предизвика вистинска бура низ фудбалска Европа. Европската куќа на фудбалот (УЕФА) излезе со исклучително остро и директно соопштение во кое ја осудува намерата на светската централа.
„Ова преминува граница која фудбалските владејачки институции никогаш не би смееле да ја минат. УЕФА ова го сфаќа исклучително сериозно. Истото треба да го направат и сите национални фудбалски асоцијации. Истото треба да го направат и сите засегнати страни: лигите, клубовите, играчите, навивачите, владите и сите кои се грижат за иднината на играта“, се вели во соопштението на УЕФА.
Во својот напад кон Инфантино, од Нион додадоа дека душата и управувањето со фудбалот не се средства за тргување, особено не со нула транспарентност околу тоа кој финансиски ќе профитира. Тие потенцираа дека никој не е сопственик на фудбалот и дека тој не е сопственост на ФИФА за таа да го продава.
Глобални критики за корпоративната алчност
Остри реакции пристигнаа и од политичкиот врв ширум светот. Британскиот премиер Енди Барнам јавно порача дека Светското првенство не е производ, туку најголемото натпреварување во светскиот спорт кое никогаш не било наменето за продажба. Во сличен тон реагираше и американскиот конгресмен Џејми Раскин, кој обвини за корупција и корпоративно валкање на прекрасната игра.
Иако ФИФА очекува да инкасира рекордни 15 милијарди долари само од циклусот кој заврши со овогодинешното Светско првенство, плановите за агресивна комерцијализација продолжуваат со полно темпо. Останува да се види дали Инфантино ќе успее да го протурка овој контроверзен предлог преку 37-члениот совет и националните асоцијации, или притисокот од УЕФА ќе го блокира влезот на приватниот капитал во сржта на светскиот фудбал.
