Англискиот претставник Астон Вила ќе има пеколно тешка задача во битката за трофејот во УЕФА Суперкупот. Тимот од Бирмингем в среда во Салцбург ќе ги одмери силите со освојувачот на Лигата на шампионите, Пари Сен Жермен, но менаџерот Унаи Емери се соочува со огромни проблеми околу составот.
Иако првично беа најавени во списокот минатата недела, Емери на официјалната прес-конференција потврди дека Астон Вила ќе настапи без своите три најголеми ѕвезди – голманот Емилијано Мартинез и англиските репрезентативци Езри Конса и Оли Воткинс.
Заслужен одмор за мундијалските херои
Причината за нивното отсуство не е повреда, туку исцрпеност. Тројцата фудбалери беа активни до самиот крај на неодамнешното Светско првенство. Мартинез бранеше за Аргентина во големото финале каде претрпеа пораз од Шпанија (1-0), додека Конса и Воткинс останаа до последниот ден освојувајќи го третото место со Англија по победата над Франција.
„Тие не се тука бидејќи ја завршија сезоната на 19 јули. Им дадов четири недели за одмор и тоа е апсолутно неопходно. Се разбира, ако беа со нас, можеби ќе имавме повеќе шанси, но ќе го подготвиме натпреварот со играчите кои ги имаме, вклучително и некои млади таленти“, изјави Емери, додавајќи дека ПСЖ е апсолутен фаворит на оваа средба.
Проблеми со повреди и трансфери: Шанса за младите
Покрај триото кое одмара, Астон Вила ќе биде и без Леон Бејли. Брзоногиот офанзивец воопшто не отпатува со тимот за Австрија бидејќи остана во Англија поради финализирање на преговорите за негов трансфер. Натпреварот ќе го пропушти и Јохан Манзамби кој се опоравува од повреда на коленото.
Сепак, има и една позитивна вест за навивачите на Вила – капитенот Џон Мегин е прогласен за фит! Иако минатата недела претрпе повреда на коленото, деталните скенери покажаа дека не станува збор за ништо сериозно и тој ќе ја предводи екипата.
Празнините во ростерот Емери ги пополни со младинци. Дваесетгодишниот бек Тристон Роу и 17-годишниот напаѓач Брајан Маџо се приклучија на првиот тим и ќе претставуваат дополнителни опции покрај искусниот Теми Абрахам.
ПСЖ во полн сјај со едно познато лице
За разлика од англискиот тим кој тренираше во Бирмингем пред да одлета за Австрија, четата на Луис Енрике одржа целосен тренинг во Салцбург и нема проблеми со одморот на своите ѕвезди. Францускиот шампион веќе ги врати во ритам играчите кои настапија во завршницата на Мундијалот, вклучувајќи ги Усман Дембеле, Бредли Баркола и Фабијан Руиз.
Она што е особено интересно е што ПСЖ во неделата официјално го потврди трансферот на поранешниот лев бек на Астон Вила, Лукас Дињ, кој сега би можел да дебитира токму против својот поранешен клуб.
Следете нè: Facebook | Instagram | X
