Младиот француски тенисер Артур Фис го оствари најголемиот успех во својата досегашна кариера, освојувајќи го престижниот Мастерс турнир во Синсинати. Во драматично финале исполнето со пресврти, 22-годишниот Фис славеше над домашниот миленик Френсис Тијафо со 2-1 во сетови (6-3, 1-6, 6-0), со што стави крај на 12-годишното чекање на Франција за трофеј од серијата Мастерс 1000.
Фуриозен старт, неочекуван пад и разговор пред огледало
Фис влезе мотивирано во своето прво Мастерс финале и веднаш наметна фуриозно темпо, диктирајќи ја играта со разорни форхенди. Французинот брзо поведе со 3-0, не се соочи со ниту една брејк-топка на сопствен сервис и рутински го освои првиот сет со 6-3.
Сепак, 28-годишниот Тијафо, носен од огромната поддршка од домашната публика во Охајо, одговори експресно. Американскиот тенисер го подигна нивото на игра, ја искористи кратката деконцентрација на Фис и со убедливи 1-6 го одведе мечот во одлучувачки сет.
По завршувањето на вториот сет, Фис побара пауза за тоалет – момент кој се покажа како клучна пресвртница.
„Беше навистина тешко бидејќи започнав многу силно, а потоа го загубив фокусот, додека тој играше неверојатно. Заминав во тоалетот, се погледнав во огледалото и си реков: ‘Дури и да мораш да загубиш, нема да станеш полош играч, затоа мораш да се бориш и да најдеш начин’. Мојот тренер исто така ми даде неколку совети и еве нè сега со пехарот“, откри Фис по мечот.
„Бевречка“ во третиот сет за крај на француското проклетство
Реакцијата на Фис во одлучувачкиот сет беше застрашувачка. Со екстремен топспин на форхендот и агресивна игра од секоја позиција на теренот, францускиот тенисер целосно го демолираше противникот, освојувајќи го третиот сет со максимални 6-0 за својата петта АТП титула во кариерата.
Со овој триумф, Фис стана првиот Французин што освоил Мастерс 1000 турнир уште од триумфот на Жо-Вилфрид Цонга во Торонто во 2014 година. Воедно, тој е само втор тенисер роден во 2004 година или подоцна со ваков престижен трофеј, по Јакуб Меншик.
Cincy Champion has a nice ring to it ✨🏆@ArthurFils | #CincyTennis pic.twitter.com/8kw6IB9otT
— Cincinnati Open (@CincyTennis) August 23, 2026
Скок на ранг-листата и совршен залет за УС Опен
Оваа победа му носи огромен скок на Фис на АТП листата. Од денес тој ќе напредува за десет позиции и ќе го достигне својот најдобар пласман во кариерата – 11-то место на светот, веднаш зад Тејлор Фриц, додека во трката за завршниот АТП Мастерс во Торино се искачува на петтото место.
Французинот влегува во совршена форма пред почетокот на УС Опен, каде што поради ланската повреда на грбот нема да брани ниту еден поен, што му отвора чист пат кон влез во елитниот топ 10.
