Тотенхем официјално го потврди ангажманот на бразилското крило Савињо од редовите на Манчестер Сити. Во зделка која претставува рекордна продажба за „граѓаните“, лондонскиот клуб ќе плати почетни 75 милиони фунти, со дополнителни 10 милиони фунти во форма на бонуси кои зависат од неговиот настап.
The gaffer on our latest arrival 🗣️ pic.twitter.com/6h2c4L6tZu
— Tottenham Hotspur (@SpursOfficial) August 25, 2026
Ново име и свеж старт со „седумнаесетката“
Дваесет и двегодишниот фудбалер, кој потпиша долгорочен договор со „спарси“, имаше и едно посебно барање при промоцијата. Иако за време на неговиот престој во Англија стана познат како Савињо, тој побара во новата етапа од кариерата да се користи неговото вистинско име – Савио. Ова име ќе стои и на грбот од неговиот нов дрес со број 17.
„Ова е прекрасна можност во брилијантен клуб со еден од најдобрите менаџери во светот. Штом разговарав со тренерот, знаев дека морам да дојдам. Тој сака да ми помогне да го достигнам највисокото ниво, а јас верувам дека тоа можеме да го направиме заедно“, изјави Савио, кој минатата сезона под водство на Пеп Гвардиола доби шанса на само седум натпревари како стартер во Премиер лигата.
Де Зерби гради моќен Тотенхем
Менаџерот на Тотенхем, Роберто Де Зерби, не го криеше задоволството од новото засилување. „Савио е играч кој носи енергија, имагинација и квалитет на крилните позиции. Има храброст да ги напаѓа дефанзивците и способност да го промени текот на натпреварот со својата креативност“, истакна италијанскиот стратег.
Доаѓањето на Савио е само дел од огромната летна реконструкција на лондонскиот клуб. Тотенхем веќе потроши над 300 милиони фунти за нови фудбалери, носејќи ги Матеус Фернандес, Сандро Тонали и Јан Пол ван Хеке, како и Маркос Сенеси, Енди Робертсон и голманот Мартин Дубравка кои пристигнаа како слободни играчи.
Тука можеби не е крајот на трансферите на релација Манчестер – Лондон, бидејќи Тотенхем во моментов води напредни преговори за ангажман и на напаѓачот Омар Мармуш од Манчестер Сити, што уште еднаш ги потврдува високите амбиции на клубот за оваа сезона.
