Ферари подготвува вистински спектакл и емотивен викенд за своите „тифози“ на домашната трка за Големата награда на Италија. Тимот од Маранело официјално ги претстави специјалните тркачки одела што Луис Хамилтон и Шарл Леклер ќе ги носат во Монца, како дел од големата почит кон легендарниот Михаел Шумахер.
30 години од првата победа во црвено
Овој викенд во „Храмот на брзината“ има посебно значење. Имено, се одбележуваат точно 30 години откако Шумахер ја оствари својата прва победа во дресот на Ферари токму во Монца во 1996 година, но и 20 години од неговиот последен Ф1 триумф во 2006 година. Во негова чест, дизајнот на новите одела е инспириран од тој славен период.
Традиционалната црвена боја доминира, но сега е надополнета со тенки бели линии кои потсетуваат на дизајнот од 1996 година. Највпечатливиот детаљ се седумте ѕвезди сместени на грбот (како оние од неговата кацига), симболизирајќи ги неговите рекордни седум светски титули, од кои дури пет освои по ред со Ферари (2000-2004). Дополнително, личното лого на германскиот ас е извезено на појасот од оделата.
A legacy celebrated. Unveiling our special race suits for Monza, inspired by Michael Schumacher’s impact on the racing world 💪 pic.twitter.com/2PSw5UiCfQ
— Scuderia Ferrari HP (@ScuderiaFerrari) August 28, 2026
Уникатен болид и борба за врвот
Освен облеката на возачите, Ферари најави дека и болидот SF-26 ќе добие специјален ретро-изглед и уникатна посвета за германската легенда. Оваа емотивна викенд-програма доаѓа во клучен момент за тимот, кој моментално е на второто место во конструкторскиот поредок. Со Хамилтон и Леклер зад воланот, тимот од Маранело ќе се обиде да ја прекине доминацијата на ривалите и да им подари победа на домашните навивачи во чест на најуспешниот возач во нивната историја.
