Грчкиот тенисер Стефанос Циципас отворено проговори за суспензијата на својот долгогодишен ривал Ник Кирјос, истакнувајќи дека знаел за позитивниот тест на кокаин на Австралиецот уште пред истиот да биде официјално објавен во јавноста.
По победата над Артур Фис во првото коло на УС Опен, 28-годишниот Циципас даде директен коментар за казната на Кирјос, нагласувајќи дека случувањата надвор од терените веќе подолго време се тема на разговор меѓу играчите на АТП турнејата.
„Да бидам целосно искрен, знаев за ова пред официјалното соопштение. Кога ја видов веста на социјалните мрежи, си реков – еве го. Очекував ваков исход. Знаев за работите што се случуваат надвор од тениските терени. Слушав лично за неговото однесување од луѓе во нашето опкружување. Изненаден сум само што сето ова дојде толку доцна“, изјави поранешниот светски рекет број 3.
Stefanos Tsitsipas says he was not surprised by Nick Kyrgios’ suspension for cocaine… he’s just surprised it came so late
— The Tennis Letter (@TheTennisLetter) August 31, 2026
“I don’t know what to tell you. To be entirely honest with you I knew about this before the announcement. I’ll just tell you the truth. I knew about all… pic.twitter.com/ZlMLHvjKUQ
Позитивен тест и признание за грешката
Потсетуваме, 31-годишниот Кирјос заработи привремена суспензија од Меѓународната агенција за интегритет во тенисот (ИТИА) откако неговиот примерок од турнирот во Мајорка на 22 јуни беше позитивен на бензоилекгонин, метаболит на кокаин. Суспензијата стапи на сила на 4 август, а случајот стана јавен на 19 август.
Австралиецот брзо ја призна вината и упати јавно извинување, нарекувајќи го својот потег „огромна грешка“. Во своето обраќање, тој објасни дека менталните борби поврзани со константните повреди и соочувањето со фактот дека неговата кариера се ближи кон крајот зеле сериозен данок врз неговата психолошка состојба. За време на суспензијата, Кирјос нема право да се натпреварува, да работи како тренер или да присуствува на официјални тениски настани.
Долгогодишно ривалство и тензии
Студените односи меѓу Циципас и Кирјос траат со години, а кулминацијата ја достигнаа на Вимблдон во 2022 година. Тој натпревар, кој му припадна на Кирјос во четири сета на патот до финалето, изобилуваше со инциденти. Австралиецот постојано се расправаше со судијата барајќи дисквалификација за противникот, додека фрустрираниот Циципас во два наврати намерно удираше топчиња кон него и публиката.
По тој меч, Циципас го обвини Кирјос за „константно малтретирање“ и изјави дека има „многу лоша страна“, на што Австралиецот одговори со тврдење дека грчкиот тенисер има „сериозни проблеми“.
