Арина Сабаленка продолжува да гази на терените во „Флешинг Медоус“ во обид да стигне до својата трета последователна титула на УС Опен. Белоруската тенисерка без поголеми проблеми, со 2-0 во сетови (6-4, 6-3), ја елиминираше Тејлор Таунсенд и се пласираше во своето шесто по ред четвртфинале во Њујорк.
Иако нејзиното прво место на ВТА листата е под сериозна закана, моќната Сабаленка покажува дека притисокот воопшто не допира до неа.
Игнорирање на калкулациите и социјалните мрежи
Уште од самото пристигнување во Њујорк, јасно беше дека Елена Рибакина, Џесика Пегула и Коко Гоф имаат математички шанси да ја симнат Сабаленка од тронот кој го држи уште од октомври 2024 година. Но, за да се случи тоа, потребна е цела низа на поклопување на резултати и многу „ако“.
„Целосно се исклучувам од тие муабети, бидејќи сè се сведува на претпоставки и на тоа ‘ако, ако, ако’. Фокусирана сум исклучиво на себе. Се обидувам да го прикажам мојот најдобар тенис секогаш кога ќе излезам на теренот. Социјалните мрежи постојано нудат некакви сценарија и статистики, но јас се трудам да стојам настрана од тоа“, изјави Сабаленка.
Тежината на круната и опасната комфорна зона
За Сабаленка ова е 99-та недела по ред на врвот на женскиот тенис (шеста најуспешна низа во историјата). Таа е свесна дека секоја противничка игра со посебен мотив против неа.
„Сите сакаат да ве победат. Луѓето веројатно не разбираат колку е тешко ментално и физички да се одржи тоа ниво. Ментално се исклучувам од фактот дека сум број 1, бидејќи во моментот кога ќе почнете да размислувате за тоа, веќе сте изгубиле. Дури и кога играм перфектно, се трудам да не летам во облаци. Ако си помислите дека ништо не може да тргне наопаку, тоа може да ве уништи“, објаснува 28-годишната ѕвезда.
Шампионски судир во четвртфиналето
Следен предизвик за Сабаленка ќе биде актуелната шампионка на Вимблдон, Линда Носкова, која по голема борба ја совлада Марта Костјук со 7-5, 5-7, 6-3.
Иако Белорусинката води со 2-0 во меѓусебните дуели (вклучувајќи ја и победата во Индијан Велс оваа година), таа повикува на претпазливост.
„Линда негува навистина агресивен стил. Сервира одлично и игра супер-брзо. Морате да останете многу ниско на нозете за да можете да се справите со таа моќ и енергија,“ заклучи Сабаленка.
