Еден од најпознатите и најреномирани фудбалски инсајдери, Дејвид Орнстин од „The Athletic“, ексклузивно пренесува дека менаџерот на Арсенал, Микел Артета, ја договорил својата иднина со клубот и ќе потпише нов, значително подобрен договор.
Награда за враќањето на шампионскиот сјај
Претходниот договор на 44-годишниот шпански стратег, кој беше потпишан во септември 2024 година, истекуваше во летото 2027 година. Меѓутоа, по историската сезона во која Артета му ја донесе на Арсенал првата титула во Премиер лигата по пауза од цели 22 години (сезона 2025/26), раководството експресно реагираше. Заедно со Артета, во процес на обновување на договорите е и комплетниот стручен штаб на „Топџиите“.
Копретседателот на клубот, Џош Кроенке, по освојувањето на титулата изјави дека задржувањето на Артета е „врвен приоритет“, а според Орнстин, сега тој договор е на чекор до официјализирање, со јасна цел да се изгради долгорочна шампионска династија.
Од десеттото место до финале во Лигата на шампионите
Патот на Артета на клупата на лондонскиот гигант е вистинска фудбалска бајка. Тој пристигна во декември 2019 година како наследник на Унаи Емери, напуштајќи ја позицијата помошник на Пеп Гвардиола во Манчестер Сити. Во тој момент, Арсенал беше тим во транзиција кој тавореше на десеттото место на табелата.
Откако ја стабилизираше екипата и го освои ФА Купот во својата прва сезона, Артета трпеливо го градеше тимот. По три последователни втори места (од 2023 до 2025 година), минатата сезона Арсенал конечно го покори англискиот фудбал. Покрај домашниот успех, тимот стигна и до финалето во Лигата на шампионите (дури второ во клупската историја), каде што несреќно загуби од ПСЖ по изведување на пенали. Како круна на овие успеси, Арсенал е номиниран за престижната награда „Најдобар клуб“ за 2026 година во изборот за Златната топка.
Со вкупно 360 натпревари зад себе, Артета моментално е менаџерот со најдолг континуиран стаж во првите четири англиски дивизии. Иако тимот изминатиов викенд претрпе пораз од Брајтон (3-0), импресивната серија од седум победи пред тоа докажува дека Шпанецот нема намера да застане тука и дека е подготвен за континуирана еволуција на тимот.
