Две години по неговото пристигнување во Интер Мајами, Лионел Меси не покажува знаци на забавување. Аргентинецот, кој ја освои наградата за најкорисен играч (МВП) во МЛС во 2024 со 20 голови и 16 асистенции во само 19 меча, повторно руши рекорди и го предводи тимот кон нова историска сезона.
Интер Мајами постави рекорд за најмногу освоени бодови минатата сезона, освојувајќи ја титулата “Supporters’ Shield”, а и оваа година се движат по слична патека. Заслугата, пред сè, оди на сметка на Меси, кој веќе има 16 голови и 7 асистенции во 16 одиграни натпревари.
Она што ја истакнува неговата форма е историската низа од пет последователни меча со најмалку два постигнати гола, нешто што досега никој не го направил во МЛС. Последните три победи над Монтреал, Њу Ингланд и Нешвил повторно беа во знакот на Меси.
По враќањето од Светското клупско првенство, каде што Меси постигна мајсторски гол од слободен удар против Порто, тој продолжи со исто темпо во домашниот шампионат. Головите кои ги постигна доаѓаат во сите можни форми: од типични удари во агол, прецизни “чипови” над голманите, дриблинзи од половина терен, па сè до слободни удари какви што може само тој да изведе.
El mejor de todos los tiempos #Messi pic.twitter.com/51pkfmbAVW
— Inter Miami CF (@InterMiamiCF) July 13, 2025
Тренерот на Интер Мајами, Хавиер Маскерано, по победата над Нешвил изјави: “Нема зборови. Секој трет ден руши нови рекорди. Тој е знамето на овој тим, пример како треба да се натпреваруваме и водич за своите соиграчи. Чест е да се биде дел од оваа фаза на неговата кариера”.
Дека Меси е уште гладен за успеси сведочи и тоа што е пред потпишување на нов договор со клубот од Флорида и покрај шпекулациите околу неговата иднина.
Во моментот, Интер Мајами е пет бода зад лидерот Филаделфија во битката за “Supporters’ Shield”, но има три натпревари помалку и подобар просек од бодови по меч. Сè укажува дека сезоната повторно ќе биде во знакот на Меси.
Ако нешто научивме досега, тоа е дека кога Лионел Меси ќе влезе во ритам – границите не постојат.
