Македонската сениорска кошаркарска репрезентација доби значително засилување. Теодор Симиќ, највисокиот играч во ростерот, денеска им се приклучи на соиграчите во базата во Гевгелија. Со неговото доаѓање, селекторот Марјан Илиевски добива важна опција во внатрешната линија, токму на позицијата каде што најмногу недостасуваше висина во првите денови од подготовките.
Симиќ веднаш ќе влезе во тренажниот процес и конкуренцијата за место под обрачите. Тој е и првиот “домашен” играч од списокот кој Илиевски го објави пред почетокот на подготовките, што дополнително го олеснува процесот на адаптација. Вториот дел од минатата сезона го мина во редовите на Кожув, па со враќањето во Гевгелија, Симиќ се чувствува како на своја територија.
“Ако ништо друго, барем нема да ми треба адаптација на условите. Знаеме што нè чека и мораме да влеземе максимално ангажирани во овој решавачки дел од подготовките. Тимот е млад, што значи дека обврските се поголеми, но и мотивацијата расте. Се познаваме добро меѓусебно, што ќе ни помогне побрзо да го усвоиме тактичкиот дел”, изјави Симиќ по пристигнувањето во хотелот “Аполонија”.
Пред македонската селекција се серија на интензивни тренинзи и две контролни средби, по кои ќе следуваат натпреварите против Романија и Унгарија во рамки на претквалификациите за Европското првенство. Симиќ најавува дека тимот ќе биде подготвен: “Овие контролни дуели ќе ни покажат каде сме и што треба да поправиме. Целта е јасна – што повеќе победи и место во следната фаза”.
Со враќањето на Симиќ, Македонија го засилува рекетот и добива дополнителна сигурност под кошот, токму во периодот кога секој детаљ може да направи разлика.
