Светот на борењето и спортската забава е во жалост. Тери Болеа, познат на целиот свет како легендарниот Хулк Хоган, почина на 71-годишна возраст по срцев удар во својот дом во Клирвотер, Флорида. Веста прв ја објави TMZ, а подоцна беше потврдена и од локалната полиција и од WWE.
Со неговото заминување, завршува една ера во која еден човек успеа да го трансформира професионалното борење од спорт во глобален спектакл и поп-културен феномен.
Почетокот на “Хулкоманијата” и раѓањето на WrestleMania
На почетокот на 1980-тите, со приклучувањето во групацијата на Винс Мекмен, Хулк Хоган стана апсолутна ѕвезда, а неговата популарност, позната како “Хулкоманија”, ја зафати целата нација. Со својот препознатлив изглед, мустаќите, марамата и жолто-црвената опрема – тој стана икона.
Во 1985 година, тој беше централна фигура на првата WrestleMania, настан кој оттогаш прерасна во “Супербол” на борењето. Истата година, тој го донесе спортот и на националната телевизија со настапот на првиот “Saturday Night’s Main Event”, со што го отвори патот за милиони нови фанови.
Моментот што ја испиша историјата: Битката со Андре Џинот
Најголемиот и најнезаборавниот момент во неговата кариера се случи на WrestleMania III во 1987 година. Пред повеќе од 93.000 фанови на стадионот „Силвердом“, Хоган успеа да го крене и да го фрли на подот својот противник, легендарниот Андре Џинот. Таа сцена е до ден-денес еден од најпрепознатливите моменти во историјата на спортот.
Реинвенцијата: “Холивуд” Хоган и Новиот светски поредок (nWo)
По 14 години во WWE, Хоган направи храбар потег и премина во ривалската федерација, World Championship Wrestling (WCW). Таму, тој целосно се реинвентираше, претворајќи се од најголем херој во најголем негативец, под името “Холивуд” Хулк Хоган. Тој ја формираше легендарната група New World Order (nWo), која доминираше во светот на борењето во доцните 90-ти. Својата прва WCW титула ја освои против уште една легенда, Рик Флер.
Подоцна, тој повторно се врати во WWE, каде што во 2002 година ја освои својата шеста WWE титула.
Хулк Хоган беше примен во Куќата на славните на WWE во 2005 година, а својот последен WWE натпревар го имаше следната година, со победа над Ренди Ортон. Неговото наследство како пионер и како човекот кој го издигна борењето на светско ниво ќе остане засекогаш запаметено.
