Турција го впиша вториот триумф на Еуробаскет 2025, совладувајќи ја Чешка со 92-78 и стигнувајќи до скор 2-0. Главен јунак повторно беше Алперен Сегун, кој блескаше со 23 поени, 12 скокови и 9 асистенции, а само едно додавање го одвои од историски трипл-дабл подвиг кој досега само три пати претходно се има случено на Еуробаскет.
Чешка започна жестоко, погодувајќи пет тројки во првата четвртина и запишувајќи дури 27 поени, но Турција не испаничи од нивниот налет. Избраниците на Ергин Атаман возвратија со серија од 14-0 во втората четвртина и целосно го преземаа ритамот на натпреварот.
Alperen Sengun is a different BEAST 😳#EuroBasket x @TBF pic.twitter.com/8DjLWYPHN9
— FIBA EuroBasket (@EuroBasket) August 29, 2025
Освен Сегун, свој придонес дадоа и Ерџан Османи со силен старт, како и Цеди Осман со уште една моќна трета четвртина. Турција доминираше во рекетот со 50-26 поени, целосно користејќи го изостанувањето на Весели и Балвин кај Чешка.
Иако поразени, Чесите изгледаа подобро отколку против Португалија. Мартин Петерка блескаше од клупа со 23 поени и пет тројки, но тоа не беше доволно да се спречи вториот пораз во низа.
Турција пак ја продолжува својата победничка низа, а турските навивачи во Латвија веќе скандираат “МВП” за Сегун, кој изгледа како човекот што може да ја одведе оваа генерација многу далеку.
