Ливерпул го осигура едно од своите клучни имиња и за иднинатa, откако денес Коди Гакпо официјално потпиша нов долгогодишен договор со клубот. Холандскиот напаѓач, кој во јануари 2023 година пристигна на Енфилд од ПСВ Ајндховен, веќе две и пол години е дел од “црвеното” семејство, а со новиот потпис ја потврди својата верност кон тимот.
“Се чувствувам неверојатно што го продолжувам договорот со овој прекрасен клуб. Семејството ми е среќно, јас сум среќен и тоа е многу важно. Имаме одлична група и уживам во секој момент тука”, изјави Гакпо по потпишувањето.
Од доаѓањето во Ливерпул, 26-годишникот одигра 131 натпревар, постигна 42 голови и запиша 16 асистенции. Во својата колекција веќе има титула во Премиер лигата и трофеј од Карабао купот, а на репрезентативно ниво брои 40 настапи за Холандија.
Новата сезона ја започна силно, со гол против Борнмут во првото коло и две асистенции во дербито со Њукасл.
“Целта е јасна – сакаме повторно да бидеме шампиони и да ја освоиме Лигата на шампионите. Имаме тим за големи работи, а јас сакам секоја година да бидам подобар од претходната”, додаде Гакпо.
Со ваков потег, Ливерпул не само што го задржа еден од најважните играчи во нападот, туку испрати и силна порака дека подготвува уште едно шампионско поглавје.
