Турција пак живее кошаркарска бајка, откако со 85-79 против Шведска во Арена Рига, турската репрезентација се избори за прво четвртфинале на Еуробаскет по цели 16 години.
Турците не стигнаа лесно до победата на првиот меч од нокаут-фазата. Швеѓаните тргнаа фуриозно, погодија 9 од првите 10 шутеви и цело полувреме ја држеа контролата. Турција изгледаше изненадено, но Еρѓин Атаман го најде вистинскиот рецепт во вториот дел. Со неверојатна серија од 14-0, Турција од негатива од 7 стигна до плус 7 и ја врати контролата на натпреварот.
Иако Шведска повторно успеа да се врати и двапати израмни во последната четвртина, сцената за драматичен финиш беше подготвена. Но тогаш на сцената стапи одличниот Алперен Сенгун.
Сенгун блескаше како вистински лидер и со 24 поени, 16 скока и 6 асистенции, со блокада и забивање во клучниот момент го реши натпреварот. Со тоа стана првиот Турчин со три дабл-дабл учиноци на едно Европско првенство уште од 2011 година.
Чеди Осман ја одржа Турција во игра во првото полувреме, Ерџан Османи даде важна енергија на двата краја од теренот, но целата приказна ја заврши Сенгун, кој ја внесе Турција во кошаркарска историја со прво четвртфинале од 2009 година и шест победи по ред за првпат од 1957 година.
THE FINAL NAIL BY SENGUN 🔨#EuroBasket | #MakeYourMark pic.twitter.com/BmDoA9YGaA
— FIBA EuroBasket (@EuroBasket) September 6, 2025
Во четвртфиналето Турција ќе игра против подобриот од дуелот Полска – Босна и Херцеговина, со шанса да ја продолжи магичната низа.
Швеѓаните, пак, не паднаа без борба. Петмина кошаркари беа двоцифрени, а Симон Биргандер со 14 поени и 13 скока запиша дабл-дабл. Но нивниот сон заврши пред портите на четвртфиналето.
