Актуелниот светски шампион Германија мораше жестоко да се бори за да избегне сензација, но со силна последна четвртина го скрши отпорот на Португалија и победи со 85-58 во осминафиналето на Еуробаскетот. Ова беше прв натпревар на селекторот Алекс Мумбру по закрепнувањето од акутната болест што го држеше во болница, а враќањето го прослави со пласман во четвртфинале, кое е трето по ред за Германија.
Португалија почна одлично и ја шокираше фаворизираната селекција, поведувајќи со 7-2, а потоа и со 26-21. Германците имаа само 31 поен на полувреме, што е најслаб учинок на еден дел од играта досега на турнирот. Долго време патеа поради катастрофалниот шут за три (1/24), а Португалија држеше чекор до 52-51 на крајот од третата четвртина.
Но тогаш, конечно, Германците го најдоа својот ритам. Маодо Ло ја погоди клучната тројка и ја разбуди репрезентацијата, по што Германија отвори серија од 22-3 во последната четвртина и го реши дуелот. Ло заврши со 12 поени и четири тројки, Франц Вагнер беше најистакнат со 16 поени, 7 скока и 6 асистенции, додека Денис Шредер и Исаак Бонга додадоа по 16 и 15 поени.
Threes have started to drop for Germany 🇩🇪
The lead balloons to 12!#EuroBasket pic.twitter.com/PaXKYi5mHa
— FIBA EuroBasket (@EuroBasket) September 6, 2025
Кај Португалија, Нимијас Квета имаше блескав натпревар со 18 поени и 11 скока, но немаше поддршка за да се направи чудо. И покрај тоа што Германците завршија со слаби 28% шутеви за три, доминацијата на двојките (71%) и казнетите 15 изгубени топки на ривалот беа доволни за големиот пресврт.
Со оваа победа Германија останува непоразена и го чека подобриот од дуелот Италија – Словенија во четвртфиналето. Португалија пак си заминува горда, бидејќи за првпат по 2007 година е меѓу најдобрите 16 на континентот и најави светла иднина за оваа генерација.
