Сцената е подготвена. Првиот четвртфинален дуел на Еуробаскетот носи пресметка на два тима со сосема различни приказни, но со иста цел: непобедливата Турција, која го носи товарот на очекувањата, против Полска, репрезентација што повторно пишува своја бајка.
За Турција, досегашниот пат изгледаше совршено. Екипата на Ергин Атаман функционира како “машинерија”, со комбинација од младост, искуство и ширина во ростерот. Алперен Сенгун е столбот на оваа генерација, но околу него блескаат уште многу играчи подготвени да ја преземат улогата кога е најпотребно. Но предизвикот сега е двоен, бидејќи не е само ривалот, туку и историјата. Турција стигнала до полуфинале само двапати. Во далечната 1949 и потоа на домашен терен во 2001 година. Повеќе од две децении подоцна, апетитот за медал е поголем од кога било.
Полска, пак, живее од својата улога на аутсајдер. Токму така го шокираше континентот во 2022 година кога стигна до полуфиналето, предводена од капитенот Матеуш Понитка. Сега повторно е во четвртфиналето, но со ново оружје, Џордан Лојд. Американецот му даде на тимот на Игор Миличиќ дополнителна димензија – кошаркар кој не се плаши од најголеми сцени и кој може да се спротивстави на секоја ѕвезда од другата страна.
Прашањето е едноставно: може ли ова полско дуо да ја скрши машинеријата на Турција и да ја продолжи бајката?
За љубителите на кошарката, ова ветува вистински спектакл. Судир на стилови, играчи што не познаваат предавање, страст во арената. Турција ја брка славата, Полска ја брка вебата. Едните сакаат да го прекинат 24-годишното чекање за полуфинале. Другите сакаат да докажат дека чудата се повторуваат.
