Во потег кој го означува крајот на една од најкратките и најбурните тренерски епизоди во поновата историја на Бундеслигата, Баер Леверкузен го именуваше Данецот Каспер Хјулманд за нов тренер, откако му врачи отказ на Ерик тен Хаг по само три натпревари.
Ова е приказна за еден клуб кој по историската сезона остана без своите херои, за еден неуспешен експеримент и за човекот кој конечно ја доби работата што ја посакуваше со години.
Зошто Тен Хаг доби отказ по само два натпревари?
Ерик тен Хаг пристигна во Леверкузен со огромни очекувања, како наследник на легендарниот Чаби Алонсо. Но, неговата авантура заврши експресно брзо. Причина? Катастрофалниот старт на сезоната (еден бод од два натпревари), но уште повеќе – нарушената атмосфера во соблекувалната.
Самиот Тен Хаг по отказот изјави дека тој и клубот “никогаш немале однос заснован на взаемна доверба”. Според германските медиуми, неговиот ригиден и студен пристап предизвикал голем отпор кај играчите, кои беа навикнати на харизмата на Алонсо.
Дополнителен проблем беше и фактот што клубот летово остана без “рбетот” на шампионскиот тим, Флоријан Вирц, Жереми Фримпонг, Гранит Џака, Џонатан Та и Пјеро Инкапие го напуштија бродот.
“Четврта среќа”: Кој е Каспер Хјулманд?
Именувањето на Хјулманд не е изненадување. Всушност, ова е четврти пат како Леверкузен се обидува да го доведе. Тој беше на нивната листа и во 2021, и во 2022, па дури и како прва опција по заминувањето на Алонсо, но тогаш Тен Хаг ја доби трката.
53-годишниот Данец доаѓа како поранешен селектор на Данска, која ја предводеше до полуфиналето на ЕУРО 2020. Тој е познат по својата емпатија, одличните комуникациски вештини и способноста да создаде семејна атмосфера, сè она што му недостасуваше на Тен Хаг.
Што носи Хјулманд во Леверкузен?
“Воодушевени сме што го ангажиравме Каспер Хјулманд, кого го следиме долго време”, изјави спортскиот директор Симон Ролфес. “Тој е вистинскиот човек кој ќе го врати нашиот доминантен стил на игра и ќе го развие овој нов тим.”
Фернандо Каро, претседателот на клубот, додаде: “Еден нов и млад тим како нашиот има потреба од јасни насоки и ќе профитира од транспарентниот и емпатичен стил на Каспер.”
Самиот Хјулманд, кој потпиша договор до 2027 година, изјави: “Ова е огромна чест. Задачата многу ме мотивира, да ја градам иднината на Баер Леверкузен со докажани, но и со нови, талентирани момци.”
Неговото деби ќе биде веќе овој петок, на тешкиот натпревар против Ајнтрахт Франкфурт.
