Последен пат Турција играше полуфинале на Евробаскет во 2001 година. Тогаш Хедо Туркоглу беше ѕвездата на тимот кој стигна до големото финале. Дваесет и четири години подоцна, токму Туркоглу беше првиот што скокна од трибините за да ги поздрави своите наследници, новата генерација која ја врати Турција меѓу најдобрите четири.
Турција ја совлада Полска со 91-77, останувајќи непоразена и стигнувајќи до седма победа по ред, израмнувајќи ја својата најдолга серија во историјата на Европските првенства. Ова е само второ полуфинале за Турците, кои сега го чекаат победникот од дуелот Грција – Литванија.
Полјаците почнаа силно, успеаја да го држат Алперен Шенгун без поени цели 10 минути. Но, кога тој конечно се запиша со едно моќно забивање, мечот доби нов тек . Турција го заврши полувремето со серија од 22-10 и од минимална предност стигна до плус 14 (46-32).
Иако Полска не се предаваше и на три минути до крај стигна на минус 8, квалитетот на Шенгун беше пресилен. 23 годишниот центар постигна 19 поени, 12 скока и 10 асистенции, станувајќи најмладиот играч со трипл-дабл во историјата на Европските првенства. Тој се придружи на елитната листа со Кукоч, Вранковиќ, Понитка, Мандаче и Дончиќ, единствените со вакво остварување откако официјално се бројат скоковите и асистенциите.
Sengun collects his first points with a HAMMER 🔨#EuroBasket x @TBF 🇹🇷 pic.twitter.com/1RswnSseY7
— FIBA EuroBasket (@EuroBasket) September 9, 2025
Овој турнир е вистинска демонстрација на силата на Шенгун, седум натпревари во низа со најмалку 15 поени, 5 скока и 5 асистенции. А кога Турција постигнува над 45 поени во првото полувреме, историјата вели едно: 12-0 во овој век.
Имаше и моменти на загриженост. Чеди Осман се повреди по судир со Понитка и накратко го напушти паркетот, но се врати во завршницата и ја смири нацијата.
Полска пак ја заврши својата приказна во четвртфиналето, второ по ред, но не успеа да го повтори подвигот од 2022 година кога заврши четврта. И овојпат играчите на Милчиќ се бореа до крај, со навивачите зад нив, но не постоеше вистински одговор за машинеријата на Ергин Атаман.
Турција е повторно меѓу четирите најдобри. Прашањето сега е дали оваа генерација ќе ја донесе само втората медала во историјата на турската кошарка?
