Милан обезбеди лесен и убедлив пласман во следната рунда од Купот на Италија, откако на домашен терен рутински го совлада Лече со 3:0. Натпреварот на “Сан Сиро” беше решен уште во раната фаза, кога гостите останаа со играч помалку, а вечерта ја одбележа и долгоочекуваниот прв гол на големото засилување, Кристофер Нкунку.
Црвениот картон во 18-та минута го реши натпреварот
Клучниот момент на натпреварот се случи уште во 18-тата минута. Кристофер Нкунку излезе сам пред голманот на Лече, а дефанзивецот Јамил Зиберт немаше друг избор освен да го сруши како последен играч во одбраната. По консултација со ВАР, судијата му покажа директен црвен картон, со што практично го реши прашањето на победникот.
Само две минути подоцна, Милан ја искористи предноста. По одлична асистенција на Давиде Бартесаги, мексиканскиот напаѓач Сантјаго Хименез од непосредна близина ја смести топката во мрежата за водство од 1:0.
Нкунку конечно го скрши мразот
Навивачите на Милан долго го чекаа овој момент. На почетокот на второто полувреме, во 51-та минута, Кристофер Нкунку конечно го постигна својот дебитантски, официјален гол во дресот на “росонерите”. По едно нафрлување од Салемакерс по брзо изведен корнер, тој одлично се снајде во шеснаесетникот и со полу-ножички зголеми на 2:0, ставајќи крај на сите дилеми.
Доминација во бројки и гол на Пулишиќ за крај
Со играч повеќе, Милан целосно доминираше на теренот. Статистиката најдобро го покажува тоа, “росонерите” имаа дури 24 удари кон голот (10 во рамките), наспроти само 2 на Лече.
Конечниот резултат го постави Кристијан Пулишиќ во 64-тата минута, кој по одлична асистенција на Јусуф Фофана, рутински ја смести топката во мрежата за конечни 3:0.
Погледнете ги најдобрите моменти од натпреварот и деби-голот на Нкунку:
