Постојат фудбалери кои ги паметиме по головите. Постојат и такви кои ги паметиме по трофеите. А потоа, постои Хенрик Ларсон, човек кој е синоним за лојалност, интелигенција и скромност, легенда чие наследство е многу поголемо од неговите 498 гола во кариерата.
Од Глазгов до Барселона и Манчестер, тој беше напаѓачот на кој секогаш можеше да се потпреш кога е најважно. Во ексклузивно интервју за Flashscore, “Кралот на кралевите” зборува за својата блескава кариера, за соиграчите кои го променија фудбалот и за новата генерација на шведски ѕвезди.
Човекот зад легендата: Холандија како школо, Шкотска како дом
Пред да стане икона, Ларсон помина низ вистинско фудбалско образование во холандскиот Феенорд.
“Преселбата во Холандија беше поинаква. Нова култура, нов јазик… морав да се прилагодам. Но, тоа беше добро искуство, научив што значи да се биде професионален фудбалер”, се присетува тој.
Но, ако Холандија беше школо, Шкотска беше неговиот дом. Во Селтик, од 1997 до 2004 година, тој стана бесмртен. Со неверојатни 242 гола на 315 натпревари, тој не беше само голгетер, туку срцето и душата на тимот.
“Селтик е местото каде што станав играчот што на крајот сите го видоа, каде што го изградив моето име и имав огромен успех”, вели Ларсон.
Најдраг спомен? Легендарното “Old Firm” дерби од 2000 година.
“Да, морам да кажам дека не беше лошо кога го победивме другиот тим со 6:2, а постигнав и одличен гол на тој натпревар”, се смее Ларсон, мислејќи на неговиот легендарен лоб-удар над Штефан Клос.
Круната во Барселона: Во друштво на боговите и раѓањето на Меси
Во 2004 година, Ларсон се пресели во Барселона и стана дел од еден од најмагичните тимови на сите времиња: со Роналдињо, Ето, Чави и Иниеста. Таму, тој беше сведок и на раѓањето на една идна легенда.
“Видовте дека има потенцијал да стане голем играч”, се сеќава Ларсон за младиот Лионел Меси. “Но, во тоа време, јас играв со најдобриот играч на светот, Роналдињо, и не можев да замислам дека некој може да биде подобар од него. Но, Меси докажа дека е можно. Тој стана, веројатно, најдобриот играч што сме го виделе.”
Круна на неговата кариера беше финалето во Лигата на шампионите во 2006 година, кога како резерва влезе во игра и со две асистенции го реши натпреварот против Арсенал. “Тие две асистенции се причината зошто секогаш ќе бидам голем дел од историјата на Барселона”, вели тој.
Лекциите од Фергусон и дисциплината на Роналдо
Во 2007 година, Ларсон пристигна на десетнеделна позајмица во Манчестер Јунајтед, потег кој му го донесе и печатот на најголемиот – Сер Алекс Фергусон.
“Кога вежбавме шутеви, Сер Алекс секогаш велеше: ‘Погоди ја целта’. Ако промашиш, веднаш ќе го слушнеш неговиот глас. Тој фокус те тераше да бидеш сигурен дека следниот пат ќе погодиш”, раскажува Ларсон.
Таму, тој беше сведок и на неверојатната работна етика на младиот Кристијано Роналдо.
“Неговата желба секогаш да остане по тренингот и да вежба слободни удари, да бара од голманите да останат со него… Секогаш даваше 100%, беше во теретана пред тренинг, правеше ледени бањи потоа… Без да се грижиш за своето тело, невозможно е да играш по 35-тата година.”
Иднината е светла: Новата генерација на шведски ѕвезди
Денес, Ларсон ужива во улогата на горд татко и аналитичар. Неговиот син, Џордан, игра за Копенхаген и неодамна го постигна својот прв гол во Лигата на шампионите.
Ларсон има високо мислење и за новата генерација на шведски ѕвезди, особено за Александер Исак, за кого открива еден интересен детал:
“Им кажав на Барселона за него кога бев таму како тренер. Ме прашаа за листа на напаѓачи, и јас реков – Александер Исак. На таа листа беше и Левандовски.”
На крајот, ова е приказна за еден човек кој фудбалот го играше со интелегенција, го живееше со страст и го напушти со достоинство. Хенрик Ларсон, „Кралот на кралевите“.
