Бајката на Валентин Вашеро заврши во полуфиналето, но само затоа што од другата страна на мрежата стоеше актуелниот шампион во својата препознатлива форма. Карлос Алкараз славеше против миленикот на домашната публика со 6-4, 6-4, со што закажа финале од соништата против Јаник Синер.
Утрешниот дуел во Монте Карло ќе биде директна пресметка за првото место на АТП листата, а кој ќе победи во недела, од понеделник ќе биде најдобриот тенисер на планетата.
Алкараз ја покажа шампионската моќ
Иако Вашеро влезе во мечот со огромна самодоверба и поддршка од трибините, Алкараз потсети зошто минатата сезона на земја имаше нестварен скор од 22-1. Шпанецот диктираше пеколно темпо од основната линија, принудувајќи го домашниот тенисер постојано да се брани. Карлос заврши со 20 директни поени, додека Вашеро успеа да запише само седум.
Клучниот момент се случи во вториот сет при резултат 4-4. По една необична судиска проверка и кратка пауза, Вашеро ја загуби концентрацијата, направи двојна сервис грешка, а Алкараз со маестрален дроп-шот го направи одлучувачкиот брејк кој го реши патникот во финалето.
„Ова е финалето кое сите го посакуваа. Првото место е во залог и тоа го прави мечот уште поспецијален. Едвај ја чекам мојата прва пресметка со Јаник во 2026 година. Морам да му честитам на Валентин, играше одличен тенис цела недела,“ изјави Алкараз по победата.
Вашеро заминува како победник
Иако не успеа да направи уште една сензација, Валентин Вашеро е најголемиот добитник на турнирот. Тенисерот кој лани во ова време беше на 256. место на светот, од понеделник ќе биде 17-ти рекет на планетата. Со победи над играчи како Музети и Хуркач, тој докажа дека неговата титула во Шангај минатата година не била случајност.
Статистика која застрашува: Доминацијата на „Алкараз – Синер“
Податокот дека Алкараз и Синер заедно ги освоиле последните 19 турнири на кои учествувале двајцата е едноставно фрапантен. Утре таа серија сигурно ќе стигне до бројката 20. Светот ќе престане да се врти за време на овој дуел, а двајцата најдобри млади играчи, во директна битка за историја, ќе играат за престиж и за бројот еден.
