Шпанскиот тениски феномен, Карлос Алкараз, веќе е во кнежевството Монако каде се подготвува за одбрана на титулата на Мастерсот во Монте Карло. За популарниот Карлитос, ова е почеток на клучниот дел од сезоната во кој брани дури 4.300 поени и три големи титули (Монте Карло, Рим и Ролан Гарос), но и битка за враќање на врвот на АТП листата.
Сепак, покрај спортските цели, Алкараз ја искористи првата прес-конференција за да испрати важна порака до организаторите на турнирите и АТП: Тенисерите имаат потреба од приватност!
„Камерите ни влегуваат во телефоните“
Во ерата на социјалните мрежи и постојаната потрага по „зад сцената“ содржини, Алкараз смета дека границата е веќе помината. Иако е свесен дека фановите го сакаат тоа, тој признава дека притисокот од постојаното снимање е заморен.
„За навивачите е одлично да видат што правиме внатре во објектите, но за нас играчите е малку чудно. Веќе немаме место за релаксација бидејќи постојано размислуваме дека некаде има камера и дека сите нè гледаат. Да има камери толку блиску што можат да видат што гледаме на нашите телефони е премногу. Треба да имаме простори каде што ќе бидеме сами, без снимање“, изјави најискрено Алкараз.
Враќање на омилената подлога
И покрај поплаките за приватноста, возбудата на Шпанецот за враќањето на црвената земја е евидентна. По турнејата на тврда подлога во Америка, тој едвај чекаше да се врати на „кал“.
„Ми недостигаше земјата, ми изгледаше како вечност од последниот меч на Ролан Гарос. Првите тренинзи беа само за да го фатам ритамот и да си кажам: ‘Во ред, време е повторно да ги извалкаме чорапите’. Чувството е неверојатно“, додава Карлитос.
Суеверија и одбрана на тронот
Алкараз откри дека има и мали ритуали кои му помагаат да ја задржи концентрацијата. На пример, секогаш сака да го користи истиот плакар во соблекувалната доколку претходната година победил на тој турнир. Сепак, годинава во Монте Карло тој плакар веќе бил зафатен, па ќе мора да гради нови успеси со нови навики.
Шпанецот во првото коло го чека победникот од дуелот меѓу Себастијан Баез и Стен Вавринка, а неговиот фокус е јасен: да ги врати добрите чувства на теренот, а не само да размислува за бодовите.
