Македонскиот кошаркарски талент Андреј Шошкиќ продолжува да ги воодушевува Американците. По серијата одлични настапи за универзитетот Стоуни Брук, нашиот млад плејмејкер го доби своето прво големо индивидуално признание, прогласен е за „Руки на неделата“ (Novice of the Week) во силната CAA конференција.
Ова е историски момент за програмата на Стоуни Брук, бидејќи за првпат ги „собраа“ двете неделни награди, откако соиграчот на Шошкиќ, Ерик Прат, беше именуван за „Играч на неделата“.
Недела за паметење: 15.5 поени во просек
Признанието доаѓа како резултат на фантастичната недела во која Шошкиќ беше еден од клучните фактори за двете победи на неговиот тим против Хофстра и Чарлстон.
- Против Хофстра блескаше со 20 поени (7/12 од поле, 3/6 за три), предводејќи го тимот до триумф.
- Против Чарлстон запиша уште една „двоцифрена“ партија со 11 поени, 5 скока, 5 асистенции и 2 блокади, покажувајќи ја својата сестраност.
Вкупно за неделата, Македонецот имаше просек од 15.5 поени, 4.5 скока и 4 асистенции по натпревар, со импресивен шут за три поени и перфектни 5/5 од линијата за слободни фрлања.
Интересно е што Шошкиќ сè уште е без промашување од линијата за слободни фрлања оваа сезона, погодувајќи ги сите 24 обиди досега!
