Викендот во германската Бундеслига донесе вистински земјотрес на врвот. Непобедливата серија на Баерн Минхен е прекината, и тоа на домашен терен од Аугсбург! Во меѓувреме, „фармацевтите“ конечно победија во 2026 година, а Лајпциг го торпедираше Хајденхајм.
Еве што се случуваше на германските терени:
Баерн Минхен 1-2 Аугсбург: Крај на серијата од 27 меча!
Шок на „Алијанц Арена“! Тимот на Винсент Компани, кој имаше најдобар старт во историјата на Бундеслигата (+57 гол разлика), конечно е поразен. Иако Баерн поведе во 23-тата минута преку Хироки Ито (асистенција на Олисе), гостите приредија сензационален пресврт во второто полувреме.
Артур Чавес израмни со глава во 75-тата минута, а само шест минути подоцна, Хан-Ноа Масенго го комплетираше шокот за 1-2. Во судиското продолжение, Олисе ја погоди пречката, но бодовите отидоа кај храбриот Аугсбург кој со оваа победа се одлепи од опасната зона.
𝐴-𝑈-𝑆-𝑊-𝐴̈-𝑅-𝑇-𝑆-𝑆-𝐼-𝐸-𝐺! ❤️💚🤍#FCBFCA pic.twitter.com/tJCZVcPznR
— FC Augsburg (@FCAugsburg) January 24, 2026
Баер Леверкузен 1-0 Вердер Бремен: Прва радост во 2026
По три порази во низа на стартот од годината, шампионот конечно славеше. Човек на одлука беше ветеранот Лукас Васкез, кој во 37-мата минута, по одличната акција со Маза, го постигна единствениот гол на мечот. Голманот на Бремен, Мио Бакхаус, правеше чуда на голот, но не можеше да спречи пораз на својот тим.
Ајнтрахт Франкфурт 1-3 Хофенхајм: Кабак херој во Франкфурт
Хофенхајм со пресврт стигна до големи три бода во битката за Лигата на шампионите. Калимуендо донесе предност за домаќините, но Макс Морштет и Озан Кабак (со гол и доминација во воздух) го свртеа резултатот. Автоголот на Аменда во 65-тата минута ја запечати победата на гостите.
Хајденхајм 0-3 РБ Лајпциг: Осум минути лудило
Лајпциг го реши натпреварот во период од само осум минути во второто полувреме. Ридле Баку (62′), Антонио Нуса (68′) и Давид Раум (70′) ја наполнија мрежата на немоќниот Хајденхајм за убедливи 0-3.
Мајнц 3-1 Волфсбург: Бегство од дното
Во дуелот на загрозените, Мајнц направи подвиг. Иако губеа од 3-тата минута, домаќините со головите на Тиц, Бел и Амири (од пенал) стигнаа до злато вредна победа и избегаа од последното место на табелата.
Сент Паули 0-0 Хамбургер СВ: Нерешено во дербито на Северот
Големото градско дерби (играно вчера) заврши без голови и без победник. Во натпревар со малку шанси и многу тактика, двете екипи се задоволија со бод кој не им помага многу во борбата за опстанок. Хрватскиот тинејџер Лука Вушковиќ (ХСВ) беше прогласен за играч на натпреварот.
