Навивачите на Барселона конечно можат да здивнат пред почетокот на новата сезона во шпанската Ла Лига. Каталонскиот гигант навреме ги заврши сите административни обврски и успешно ги регистрираше новите големи засилувања. Родри, Ентони Гордон и Карим Адејеми добија зелено светло од водството на лигата и му се ставени на целосно располагање на тренерот Ханси Флик за неделното гостување кај Елче (21:30 часот).
Покрај новите ѕвезди, успешно е регистриран и Андреас Кристенсен, кој се третира како ново засилување откако на 1 јули потпиша нов договор до 2028 година со драстично намалена плата. Ла Лига веќе ги потврди и броевите на дресовите за новата сезона: мега-засилувањето Родри ќе ја носи „шеснаесетката“, Адејеми го доби бројот 14, Кристенсен ќе настапува со 15, додека Ентони Гордон ја презеде „седумнаесетката“ која досега му припаѓаше на Марк Касадо.
Следен на листата за регистрација е Жоао Кансело, кој последен го комплетираше својот трансфер во четвртокот, додека младиот Џеси Бисиву ќе биде пријавен преку Б-тимот.
Враќање на правилото 1:1 по големата чистка на Деко
За првпат од сезоната 2020/21, Барселона оперира на трансфер-пазарот според правилото 1:1. Клубот конечно ги надмина финансиските проблеми кои со години создаваа огромна неизвесност пред стартот на секоја сезона. Оваа поволна ситуација е резултат на одличната спортска политика и менаџирањето на Деко, кој успеа драстично да ја намали масата на плати во клубот.
Ослободувањето на буџетот беше направено преку серија храбри потези: заминувањето на Роберт Левандовски ослободи дури 40 милиони евра, додека трансферот на Феран Торес во ПСЖ донесе чист профит од 48,5 милиони евра. Клубот заштеди и на платите на играчите кои заминаа на позајмица – Роналд Араухо во Ливерпул (кој земаше 12 милиони бруто) и Марк-Андре тер Штеген во Ајакс (како холандскиот клуб покрива 10% од платата). Дополнителен простор се отвори со продажбата на Ансу Фати во Монако за 11 милиони евра и заминувањето на Маркус Рашфорд чија плата надминуваше 10 милиони евра.
Со стабилизиран буџет и очекуваните зголемени приходи од враќањето на реновираниот „Спотифај Камп Ноу“, Барселона влегува во новата сезона со огромен оптимизам и целосно подготвен ростер за атак на шампионската титула.
