Кога Диего Симеоне ќе ја намириса крвта на противникот, неговиот Атлетико Мадрид станува најнемилосрдната машина во Европа. Во првиот чин од полуфиналето на Копа дел Реј, „јорганџиите“ не само што ја победија Барселона, туку ја понижија со нестварни 4-0, решавајќи сè уште во првото полувреме. Додека Каталонците доминираат во Ла Лига, вечерва во Мадрид изгледаа како аматерски состав фатен во виорот на „Метрополитано“.
Прво полувреме од соништата и трагичарот Ерик Гарсија
Кошмарот на гостите најави Ерик Гарсија, чие невнимателно враќање на топката помина под ногата на голманот Жоан Гарсија за бизарен автогол. Тоа беше само искрата која го запали огнот. Веќе во 14. минута, „џелатот“ на своите поранешни тимови, Антоан Гризман, со прекрасен удар ја удвои предноста, потврдувајќи зошто е прв стрелец во ова натпреварување.
Барселона беше во шок, а Атлетико напаѓаше со секој здив. Во 33. минута, по брилијантна акција во која учествуваа Џулијано Симеоне и Хулијан Алварез, новата ѕвезда Адемола Лукман зголеми на 3-0. Точка на првиот дел стави токму Алварез, кој ја прекина гол-сушата од 11 меча со вистински проектил од далечина, оставајќи ги навивачите на Барса во неверување.
ВАР апсурд од осум минути и црвен картон за крај
Вториот дел донесе бизарна сцена која влезе во историјата. На Пау Кубарси му беше поништен гол по неверојатна осумминутна ВАР проверка – рекордно долго чекање поради кое голманите мораа да се загреваат со топки за да не „замрзнат“. Одлуката за офсајд само ја потврди агонијата на гостите.
Дебаклот на Барселона го заокружи Ерик Гарсија, кој го комплетираше својот хорор-натпревар со директен црвен картон во финишот по фаулот над Алекс Баена. Со оваа предност од 4-0, Атлетико веќе со една нога е во финалето, оставајќи му на Ханси Флик невозможна мисија за реваншот на 3 март.
