Светот на тенисот доби уште една потврда зошто Дејвис Купот е посебно натпреварување. Во Болоња, бранителот на титулата Италија обезбеди пласман во своето трето последователно финале по вистински трилер против Белгија, додека Шпанија веќе има предност од 1-0 во своето полуфинале против Германија.
Италијанско „братство“: Коболи спаси 7 меч топки!
Иако играат без светскиот рекет број 1, Јаник Синер, Италијанците покажаа неверојатна длабочина и карактер. Херојот на денот беше младиот Флавио Коболи.
Откако Матео Беретини рутински донесе предност од 1-0 победувајќи го Рафаел Колињон со 6-3, 6-4, сите очи беа вперени во Коболи.
Мечот против Зизу Бергс се претвори во епска битка која траеше повеќе од три часа. Коболи успеа да спаси неверојатни седум меч топки во решавачкиот сет и го доби шестиот најдолг тај-брејк во историјата на Дејвис Купот со 17-15!.
„Победив бидејќи верував во себе три часа. Прашав кој е резултатот во тај-брејкот бидејќи не се сеќавав“, изјави еуфоричниот Коболи, кој го прослави поенот со кинеење на дресот.
Оваа победа ја носи Италија во финалето во недела, каде ќе се обидат да станат првата нација по 1971 година која освоила три титули по ред.
Шпанија поведе: Карењо Буста со чудесен пресврт
Во второто полуфинале кое е во тек, Шпанија направи голем чекор кон финалето. Пабло Карењо Буста му донесе поен на својот тим победувајќи го Јан-Ленард Штруф со 6-4, 7-6(6).
И овој меч не помина без драма. Во тај-брејкот од вториот сет, Штруф водеше со убедливи 6-1 и имаше пет врзани сет топки. Но, Шпанецот направи чудо, освои седум поени по ред и го затвори мечот со 8-6!.
Сега останува потешкиот дел за Шпанија – да го потврдат пласманот во финалето. Следниот предизвик е дуелот помеѓу Хауме Мунар и светскиот рекет број 3, Александар Зверев. Доколку Германија израмни, патникот во финалето ќе се решава во дубл.
Следете нè: Facebook | Instagram | X
