Премиер лигата ја затвора 2025 година со вистински блокбастер. Лидерот Арсенал го пречекува најпријатното изненадување и моментално „најжешкиот“ тим во Европа, Астон Вила. Само три бода ги делат овие два тима на табелата, а влогот е огромен – првото место на крајот од календарската година.
Формата на Вила: Од зона на испаѓање до титула?
Тимот на Унаи Емери изгледа незапирливо. По лошиот старт на сезоната (без победа во првите пет кола), тимот од Бирмингем влезе во неверојатна серија и моментално има 11 победи по ред во сите натпреварувања.
Она што е најимпресивно е нивната ефикасност и карактер – Вила има освоено дури 18 бодови од загубени позиции оваа сезона, повеќе од кој било друг клуб. Нивниот „џокер“, Емилијано Буендија, веќе еднаш го шокираше Арсенал со гол во 95-та минута претходниот месец, па „топџиите“ сега бараат крвна одмазда.
Проблеми во таборот на Арсенал: Повредата на Рајс е голем удар
Микел Артета се соочува со вистинска главоболка пред овој меч. Најновата вест е дека Деклан Рајс најверојатно ќе го пропушти дербито поради повреда заработена против Брајтон. Кога на тоа ќе се додадат отсуствата на Бен Вајт и Рикардо Калафиори, јасно е дека одбраната на лидерот ќе биде под огромен притисок.
Сепак, добра вест за навивачите е враќањето на Габриел Магаљаеш, како и најавата дека Каи Хаверц конечно е подготвен за настап по долгата пауза. Арсенал доминира на домашен терен со шест последователни победи на „Емирати“, но традицијата против Емери не им оди во прилог – поранешниот менаџер на Арсенал нема пораз на овој стадион откако замина од клубот.
Клучни статистики за натпреварот:
- Арсенал е прв во лигата по примени голови (само 11 во 18 меча).
- Астон Вила има постигнато 29 голови, иако нивниот xG (очекувани голови) е само 19.9, што покажува неверојатна завршница на Роџерс и Воткинс
- Унаи Емери го победи Арсенал на 4 од последните 10 меѓусебни дуели, со 4 ремија и само 2 порази.
