Денеска од 16:00 часот, спортскиот комплекс „Петар Милошевски“ во Битола ќе биде местото каде Пелистер ќе се обиде да направи клучен чекор во борбата за опстанок во Првата лига. Противник е жилавиот Силекс, екипа која сезонава покажува две различни лица, но на гостински терен изгледа речиси незапирливо.
„Чкембарите“ како ветер во грб за битолчани
По несреќниот пораз во Тетово од Шкендија, каде Пелистер покажа одлична игра во вториот дел, мотивот кај Битолчани е на највисоко ниво. Победите на конкурентите Македонија ЃП и Тиквеш само го зголемија притисокот врз „зелено-белите“.
„Во Тетово среќата не беше на наша страна, но покажавме дека можеме да се надигруваме со секого. Со максимална ангажираност и поддршка од нашиот 12-ти играч, ‘Чкембарите’, одиме на три бода“, дециден е фудбалерот на Пелистер, Филип Бошковски.
Тренерот Милан Стојаноски може да здивне бидејќи во тимот се враќа клучниот играч Швајц, кој ја одлежа суспензијата поради картони.
Силекс доаѓа да ја потврди доминацијата надвор од Кратово
Додека Силекс се мачи на домашен терен, избраниците на кратовскиот тим станаа вистински страв и трепет на гостувањата. Победите во Струга и Кавадарци се доказ за нивниот квалитет, а Дарко Додев јасно порачува дека Силекс нема намера само да набљудува во Битола.
„Силекс е најдобриот гостин во лигата и сигурно ќе се прашува за исходот во Битола. Пелистер игра добро и му требаат бодови, но ние мораме да го потврдиме нашиот квалитет и да ги однесеме трите бода дома“, вели Додев.
Традиција која ветува драма
Дуелите меѓу Пелистер и Силекс се класика во македонскиот фудбал. Интересно е што Битолчани немаат пораз од овој ривал на домашен терен во првенствен меч уште од 2020 година. Сепак, Силекс во моментов е закован на четвртата позиција и со евентуален триумф би се вклучил во сериозна трка за топ 3 пласман.
