Трката за ГП на Шпанија во Барселона донесе епски триумф за Луис Хамилтон, но зад кулисите на големата сцена се случи инцидент кој дефинитивно влегува во историјата како најбизарното и најневеројатно откажување во модерната ера на Формула 1. Иако тимот на Ауди покажа одлична брзина и беше на чекор до освојување на првите историски бодови во својата дебитантска ера, искусниот Нико Хулкенберг мораше предвреме да го заврши натпреварот во 29-от круг поради инцидент кој ниту најдобрите холивудски сценаристи не би можеле да го предвидат.
Вистинскиот предизвикувач на овој дебакл, без воопшто да има каков било физички контакт меѓу двата болида, беше возачот на Рејсинг Булс, Лијам Лосон. Во финишот на 29-от круг, додека Хулкенберг агресивно го притискаше и се наоѓаше во негова заветрина, Лосон со едното тркало излета малку пошироко на излезот од Кривината 12, подигнувајќи огромен облак од чакал. Во тој момент, едно единствено мало камче исфрлено со голема брзина од гумата на Лосон, по нереална патека долета директно во болидот на Ауди и го погоди точно во центарот на сигурносните прекинувачи (ERS итното копче за гасење) кои се наоѓаат на левата страна од заштитниот лак (рол-барот) над главата на возачот!
Болидот во истата секунда доживеа тотален софтверски и електричен блекаут. Моторот и комплетниот енергетски систем згаснаа, па Хулкенберг на чиста инерција мораше некако да допатува до пит-лејнот, каде механиците можеа само да констатираат „смрт“ на болидот.
This is the moment when Liam Lawson killed Hulkenberg's carpic.twitter.com/9pPsJ7nwpy https://t.co/8QVeCO65z7
— Holiness (@F1BigData) June 14, 2026
„Тркачкиот свет едноставно не сака уште да освоиме бодови“
По завршувањето на трката, искусниот Хулкенберг беше во тотален шок и неверување од несреќата која го снајде во моментите кога сигурно чекореше кон пласман во топ 10.
„Ова е надреално. Каменот од патеката некако успеал да го активира итното сигурносно копче над мојата глава. Тоа едноставно го уби болидот во место, тотален блекаут и играта беше завршена. Болидот беше мртов, едвај допливав до боксот. Во мојата комплетна долгогодишна кариера никогаш немам видено, ниту слушнато дека вакво нешто е воопшто возможно. Навистина нереален малер. Кога ќе видите што се случи на крајот со откажувањата на Антонели и Леклер, јасно е дека бевме во позиција за сериозни бодови. Не знам, изгледа тркачкиот свет едноставно сè уште не сака да се запишеме во бодовите“, изјави разочараниот Хулкенберг.
Ова објаснување веднаш му беше пренесено и на Лијам Лосон, чија реакција беше полна со неверување: „Дали сте сериозни?! Нема шанси. Ова е толку несреќно за Нико, навистина немав поим. Доколку некој ми кажеше намерно да гаѓам такво нешто со гумата во возење, тоа би било застрашувачки импресивно, но јас само забележав дека тој одеднаш исчезна зад мене“.
Комплетен малер за Ауди заокружен со Бортолето
Лошата среќа за Ауди во Барселона беше комплетирана со дебаклот на нивниот втор возач Габриел Бортолето, кој трката ја заврши на незавидното 11-то место, веднаш зад бодовите.
Бортолето доживеа технички проблем со притисокот на турбо-полначот уште при самата стартна процедура, поради што веднаш загуби дури шест позиции и падна на P17. Во обидот да се врати назад, токму на Кривината 12, младиот Бразилец беше брутално истиснат во тревата од Естебан Окон со Хаас, при што претрпе тешки оштетувања на левата страна од подот на болидот. Со аеродинамички осакатен болид, Бортолето не успеа да направи чудо, па Ауди по којзнае кој пат сезонава, покрај брзината, останува со празни раце поради нереални надворешни фактори.
