Најдобрата македонска тенисерка Лина Ѓорческа бележи одличен резултат и се пласираше меѓу осумте најдобри на силниот ВТА 125 челинџер турнир кој се одржува во Мадрид, Шпанија.
Во денешното осминафинале, Ѓорческа имаше исклучително тешка задача против фаворизираната Алина Корнеева од Русија (осма носителка и 122-ра на ВТА листата). Русинката го диктираше темпото во првиот сет и благодарение на два брејка успеа да го добие истиот со 6:3 по 33 минути игра.
Меѓутоа, среќата овојпат беше на страната на нашата тенисерка. Откако Ѓорческа направи брејк на самиот старт од вториот сет и поведе со 1:0, Корнеева беше принудена да го предаде натпреварот поради незгодна повреда, по нешто помалку од еден час поминат на теренот. Овој неочекуван епилог ѝ овозможи на Ѓорческа (199. на ВТА листата) сигурен влез во следната рунда.
Со самиот пласман во четвртфиналето на турнир од челинџер серијата кој има награден фонд од 100.000 евра, Ѓорческа го остварува еден од најзначајните резултати во својата досегашна кариера. Претходно во првото коло, таа прикажа сигурна игра и со 2:0 ја елиминираше јапонската претставничка Сијато.
Следната пречка за македонската тенисерка е Италијанката Лиса Пигато (189. на ВТА), која денеска направи целосен пресврт и со 2:1 во сетови ја исфрли Лаура Самсон од Чешка.
Четвртфиналниот дуел помеѓу Ѓорческа и Пигато е закажан за утре (10 април) со почеток во 13:20 часот на теренот „Вила де Мадрид“. Според букмејкерите, Пигато влегува како благ фаворит со квота 1.57 (64% шанси за победа), додека за триумф на нашата тенисерка се нуди квота од 2.25.
Останува да видиме дали Лина ќе ја искористи оваа одлична можност и ќе продолжи со блескавите настапи во шпанската престолнина.
