Бундеслигата викендов понуди голови, драма и потврда дека трката за титулата е далеку од готова. „Милионерите“ од Дортмунд фрлија ракавица в лице, но баварскиот гигант одговори со иста мера.
Еве го комплетниот преглед на 22. коло во германската елита.
Дортмунд гази: Рајерсон со 4 асистенции го уништи Мајнц!
Колото беше отворено уште во петокот, кога Борусија Дортмунд го декласираше Мајнц со 4-0. Ѕвезда на вечерта не беше некој од напаѓачите, туку десниот бек Јулијан Рајерсон, кој намести буквално сè – запиша 4 асистенции!
Серу Гираси (двапати), Максимилијан Баер и Рами Бенсебаини беа егзекуторите кои ја донесоа шестата победа по ред за тимот на Нико Ковач. Со ова, Дортмунд привремено дојде на само 3 бода до Баерн, вршејќи огромен притисок.
Баерн одговори шампионски: Кејн и Горецка го замолкнаа Бремен
Ако некој мислеше дека Баерн ќе подлегне на притисокот, се излажа. На гостувањето кај Вердер Бремен, шампионот славеше рутински со 3-0.
Хари Кејн продолжува да руши рекорди – прво погоди од пенал, а потоа со „бомба“ од далечина го зголеми своето конто на 26 гола сезонава. Точка на мечот стави Леон Горецка во второто полувреме. Со ова, разликата на врвот останува +6 за Баерн.
Леверкузен и Ајнтрахт сигурни, Хофенхајм испиша историја
Шампионот од 2024, Баер Леверкузен, немаше милост кон Сент Паули (4-0). Кванса, Шик, Тапсоба и Поку беа стрелци во доминантната претстава на „Фармацевтите“.
Во Франкфурт, Ајнтрахт конечно победи под водство на новиот тренер Алберт Риера. Жртва беше Борусија Менхенгладбах (3-0), а мечот го одбележа евроголот на младиот Амаимуни-Ечгујаб.
Вистинска фешта имаше во Синсхајм, каде Хофенхајм го победи Фрајбург со 3-0 во второто полувреме. Со ова, тимот постави нов клупски рекорд – 8 победи по ред на домашен терен!
Драма во Хамбург: Унион падна во финишот
Највозбудливиот меч се одигра на „Фолкспаркштадион“, каде Хамбург го совлада Унион Берлин со 3-2. Гостите водеа, но Хамбург направи пресврт преку Кенигсдорфер (два гола) и Капалдо. Унион намали во 89-та минута, но немаше сили за реми.
Бундеслигата продолжува да биде најатрактивната лига за голови сезонава!
